Kiberhücumlar Almaniyaya 200 milyard avrodan çox ziyan vurub

Almaniya kiberhücumlar nəticəsində rekord səviyyədə iqtisadi ziyanla üzləşir. “Strategy&” şirkətinin apardığı araşdırmaya görə, 2024-cü ildə ölkəyə dəyən zərər 202,4 milyard avro həcmində olub.

Bu böyük itkilərin əsas səbəbi Almaniyanın kibertəhlükəsizlik sahəsində mütəxəssis çatışmazlığıdır. PwC-nin qlobal biznes bölməsi olan "Strategy&" tərəfindən aparılan bu araşdırma göstərir ki, ölkədə artan hücumların qarşısını almaq üçün kifayət qədər kadr yoxdur. Bu çatışmazlıq rekord səviyyədə iqtisadi itkilərə səbəb oldu.

Sorğuda iştirak edən qurumların böyük əksəriyyəti, yəni 10-dan 9-u mütəxəssis çatışmazlığı ilə üzləşdiklərini bildirib. “Strategy&” şirkətinin tərəfdaşı və araşdırmanın müəllifi Lukas Si, ötən il edilən hücumlara dair konkret nümunələr gətirdi. O qeyd etdi ki, Almaniyanın Hava Nəqliyyatına Nəzarət Xidməti, Federal Statistika İdarəsi və Şərqi Avropa Araşdırmaları Cəmiyyəti xaricdən edilən kiberhücumların hədəfinə çevrilib.

Məlumatda əlavə edilir ki, Almaniya rəqəmsal dayanıqlığını təmin etmək istəyirsə, indi hərəkətə keçməli və bütün imkanlardan istifadə etməlidir. Ölkənin bu problemi həll etməsi iqtisadi itkilərin qarşısını almaq baxımından vacibdir.