Kiberpolis qanunsuz qumar oyunlarını sosial şəbkələrdə reklam edənlərə qarşı tədbir keçirib- VİDEO

Daxili İşlər Nazirliyinin (DİN) Kibercinayətkarlıqla Mübarizə Baş İdarəsi ölkə ərazisində qadağan edilmiş onlayn qumar oyunlarının reklamına qarşı genişmiqyaslı əməliyyat keçirib. Bu tədbirlər Prezident yanında Antiinhisar və İstehlak Bazarına Nəzarət Dövlət Agentliyinin Haqsız Rəqabət və Reklam Qanunvericiliyinə Nəzarət Şöbəsinin əməkdaşları ilə birgə aparılıb. Əməliyyat zamanı "Instagram", "TikTok" və digər sosial şəbəkə platformalarında yüksək izləyici sayına malik olan hesablarda qanunsuz qumar tətbiqlərinin təbliği aşkarlanıb. Kibercinayətkarlıqla Mübarizə Baş İdarəsi bu cür paylaşımların qarşısını almaq üçün operativ addımlar atıb.

Araşdırmalar göstərir ki, sosial mediada aktiv olan bir sıra şəxslər, yəni influenserlər, qanunsuz qumar və mərc oyunlarının reklamını həyata keçiriblər. Onlar qeyri-qanuni hesabların təbliğinə yönələn kontentlər yayaraq qanunu pozublar. Nəticədə, qanunsuz qumar və mərc oyunlarını öz səhifələrində reklam edən 17 nəfər kiberpolis tərəfindən müəyyən olunaraq Baş İdarəyə gətirilib. Həmin şəxslər barəsində qanuna uyğun tədbirlər görülüb. Polis hələ də bu cür əməllərə yol verən digər şəxslərin aşkar edilməsi istiqamətində axtarışlarını davam etdirir.

DİN sosial şəbəkə istifadəçilərinə və bu platformalarda aktiv olan şəxslərə ciddi xəbərdarlıq edir. Qeyri-qanuni qumar və mərc oyunlarının yayımını stimullaşdırmaq və ya reklam etmək birbaşa qanun pozuntusu hesab olunur. Bu əmələ yol verən şəxslər barəsində müvafiq qanunvericiliyə uyğun olaraq ciddi məsuliyyət tədbirləri nəzərdə tutulur. Vətəndaşlar bu cür fəaliyyətlərdən uzaq durmalı, qanuni tələblərə riayət etməlidirlər.