KİV: Çin şirkəti 2026-cı ildə yeni nəsil süni intellekt çipini buraxacaq

Çin texnologiya nəhəngi "Baidu" 2026-cı il üçün iddialı bir plan hazırlayıb. Şirkət bu tarixdə yeni nəsil süni intellekt (Sİ) çipi olan "Kunlun M100"-ü bazara çıxarmağı düşünür. Bu məlumatı "Yicai" nəşri yayıb.

M100 çipinin mövcud modellərdən fərqli olaraq daha yüksək göstəricilərə malik olacağı gözlənilir. Baidu bununla kifayətlənməyəcək; 2027-ci ildə daha güclü bir model olan M300 çipini təqdim etməyi də planlaşdırır. M300, əsasən, Sİ təlimi və məlumat çıxarmaq işləri üçün hazırlanır. Baidu-nun "Kunlun" seriyası çipləri hazırda Çin daxilində geniş sahələrdə istifadə edilir. Bunlara onlayn maliyyə xidmətləri, enerji sektoru, nəqliyyat və təhsil sahələri daxildir.

Şirkətin son uğurlarından biri mobil operator "China Mobile" tərəfindən keçirilən tenderdə qalib gəlməsidir. Avqust ayında "Baidu"nun "Kunlun" çipləri ilə işləyən Sİ serverləri bu tenderdə önə çıxdı. Nəşr qeyd edir ki, bu, Çin istehsalı Sİ çiplərinin genişmiqyaslı infrastruktur layihələrində istifadə edilməsinə doğru əhəmiyyətli bir hadisə oldu. "Baidu" öz çiplərini inkişaf etdirməyə 2011-ci ildə başlamışdı. 2021-ci ildə bu sahə üzrə ayrıca ixtisaslaşmış şirkət "Kunlunxin" yaradıldı. "Kunlun M100"ün və M300-ün gəlişi Baidu-nun Çinin süni intellekt bazarındakı mövqeyini daha da gücləndirəcək.