KİV: Tramp ABŞ Hərbi Dəniz Qüvvələrini "Qızıl donanma"ya çevirmək istəyir

ABŞ Prezidenti Donald Tramp ölkənin milli Hərbi Dəniz Qüvvələrinin tərkibini tamamilə yeniləməyi və onları "Qızıl donanma" ("Golden Fleet") adlanan yeni bir gücə çevirməyi düşünür. "The Wall Street Journal" qəzeti mənbələrə istinadən bu barədə məlumat yayıb.

Mənbələr bildirir ki, Ağ Ev rəsmiləri və Hərbi Dəniz Qüvvələri mövcud donanmanın yerinə Çinə və digər potensial təhlükələrə daha səmərəli cavab verə biləcək bir donanmanın yaradılması imkanlarını müzakirə edirlər. Qəzet müzakirələrin hələ ilkin mərhələdə olduğunu və Donald Trampın bu işdə şəxsən iştirak etdiyini vurğulayıb. Bu yenilənmə layihəsi Amerikanın dənizdəki hərbi mövqeyini köklü şəkildə dəyişdirməyi hədəfləyir.

Hazırda ABŞ Hərbi Dəniz Qüvvələri tərkibcə əsasən esmineslər, kreyserlər, aviadaşıyıcılar, sualtı qayıqlar və desant gəmilərindən ibarətdir. Yeni "Qızıl donanma"nın strukturu isə fərqli gəmilərdən təşkil ediləcək. Bu donanmaya uzaqmənzilli raketlərlə təchiz edilmiş iri hərbi gəmilərin daxil edilməsi gözlənilir. Eyni zamanda, Ağ Ev və Pentaqon yeni, etibarlı zirehli gəminin inşası ilə bağlı danışıqlara başlayıb. Xüsusi dizayn edilmiş bu gəmi hipersəs raketləri daşımaq qabiliyyətinə malik olacaq.

Vaşinqton bu yeni donanmanın tərkibində 280-300 gəminin, eləcə də çox sayda pilotsuz gəminin olmasını planlaşdırır. Pilotsuz gəmilərin tərkibə əlavə edilməsi donanmanın fəaliyyət dairəsini genişləndirməyə imkan verəcək. Qəzet bu böyük yenilənmə planının həyata keçirilmə müddəti və ümumi dəyəri barədə hələ ki, heç bir konkret məlumat verməyib.