Laşa Maqradze: BBC Gürcüstana qarşı məqsədyönlü dezinformasiya yayır

Gürcüstanın Dövlət Təhlükəsizlik Xidməti (DTX) rəhbərinin müavini Laşa Maqradze bildirib ki, BBC telekanalının Tbilisidə keçən ilin sonunda etirazçılara qarşı kimyəvi silahın tətbiq edilməsi barədə yaydığı bəyanat açıq dezinformasiyadır. O, brifinqdə çıxışı zamanı qeyd edib ki, araşdırma nəticəsində əldə olunan məlumatlar BBC-nin filmində səsləndirilən iddiaların həqiqəti əks etdirmədiyini birmənalı şəkildə sübut edir. Maqradze vurğulayıb ki, bu məlumatın yayılması Gürcüstanın dövlət maraqlarına zərər vurmaq məqsədi daşıyır. Söhbət BBC-nin guya etirazçılara qarşı "Kamit" adlı zəhərli maddənin istifadə edilməsi barədə yayımladığı materialdan gedir.

DTX rəhbərinin müavini iddia edir ki, araşdırma nəticələri göstərir ki, iddia edilən "Kamit" maddəsinin tətbiqi haqqında məlumat məqsədyönlü şəkildə yayılıb. Maqradze vurğulayıb ki, bu, sadəcə səhv deyil; əksinə, Gürcüstana qarşı yönəldilmiş dezinformasiya kampaniyası kimi qiymətləndirilir. Bu cür iddialar Tbilisidə baş verən etiraz aksiyaları zamanı hökumət qüvvələrinin tətbiq etdiyi tədbirlər barədə beynəlxalq mediada yayılan xəbərlərin fonunda gündəmə gəlmişdi. Hökumət bu iddiaları qətiyyətlə rədd edir və yayımlanan xəbərlərin ölkənin imicinə zərər verdiyini bildirir.

Laşa Maqradzenin bugünkü açıqlaması hökumətin BBC-nin yayımladığı məzmunla bağlı mövqeyini bir daha təsdiqləyir. Qeyd etmək lazımdır ki, Gürcüstanın Baş naziri İrakli Kobaxidze də bu iddiaları əvvəllər təkzib etmişdi. Baş nazir bu həftənin əvvəlində jurnalistlərə bildirmişdi ki, BBC nümayişçilərə qarşı Birinci Dünya müharibəsindən qalma "Kamit" adlı kimyəvi maddənin tətbiq edilməsi barədə açıq şəkildə yalan məlumat yayımlayıb. Hökumət rəsmiləri bildirirlər ki, araşdırma məlumatları tam şəkildə BBC-nin yaydığı məlumatın yalan olduğunu isbat edir.