“Lukoyl” xarici aktivlərini satmağı planlaşdırır

“Lukoyl” şirkəti Avropa İttifaqı (Aİ) və ABŞ tərəfindən tətbiq edilən sanksiyalar fonunda xaricdəki aktivlərini satmağı planlaşdırdığını açıqlayıb. Bu qərar, bir sıra ölkələrin “PAO Lukoyl”a və onun törəmə şirkətlərinə qarşı məhdudlaşdırıcı tədbirlər tətbiq etməsi ilə əlaqədar verilib. Şirkətin rəsmi bəyanatında deyilir ki, beynəlxalq aktivlərinin satışına hazırlıq başlayıb və potensial alıcılardan müraciətlər artıq qəbul olunmağa başlayıb.

Aktivlərin satışı prosesi ABŞ Maliyyə Nazirliyinin Xarici Aktivlərə Nəzarət İdarəsi tərəfindən verilmiş fəaliyyətin dayandırılmasına dair lisenziyaya uyğun şəkildə həyata keçiriləcək. Şirkət, həmçinin bəyan edir ki, əgər zərurət yaranarsa, beynəlxalq aktivlərinin fasiləsiz fəaliyyətini təmin etmək məqsədi ilə bu lisenziyanın müddətinin uzadılması barədə müraciət etməyi planlayır. Şirkət bu addımı qlobal məhdudiyyətlərin təzyiqi altında atır.

Qeyd edək ki, Lukoyl və ona bağlı qurumlar əvvəllər də sanksiya hədəfi olublar. Bundan əvvəl ABŞ Maliyyə Nazirliyi “Rosneft” və “Lukoyl” şirkətlərini, eləcə də onlara məxsus 34 törəmə qurumu yeni sanksiya paketinə daxil edib. Oktyabrın ortalarında isə Böyük Britaniya da “Lukoyl”u öz sanksiya siyahısına salmışdı.