Macarıstanın "MOL Group" şirkəti bu ilin 3-cü rübündə Azərbaycanda neft hasilatını artırıb

Macarıstanın "MOL Group" şirkəti Azərbaycanda yerləşən "Azəri-Çıraq-Günəşli" (AÇG) yataqlar bloku üzrə neft hasilatını yüksəldib. Şirkətin 2025-ci ilin üçüncü rübündə ümumi hasilatdan düşən payı gündəlik 13 200 barel neft ekvivalentinə çatıb.

Bu göstərici 2024-cü ilin eyni dövründə qeydə alınan 12 500 barel göstəricisi ilə müqayisədə 5,6 faiz artım deməkdir. MOL Group 2025-ci ilin ikinci rübü ilə müqayisədə də hasilatını yüksəltməyi bacarıb. Həmin rübdə gündəlik hasilat 12 800 barrel idi; bu isə üçüncü rübdə 3,1 faiz artıb.

Lakin layihənin operatoru bp şirkətinin məlumatına görə, AÇG yataqlarında ümumi orta gündəlik hasilatda azalma müşahidə edilib. 2025-ci ilin doqquz ayı ərzində yataqlarda orta gündəlik hasilat təxminən 327 000 barel olub. 2024-cü ilin eyni dövründə isə bu göstərici 339 000 barel təşkil edirdi. Buna baxmayaraq, Macarıstan şirkəti öz payını artıraraq fərqlənib.

AÇG layihəsi üzrə Məhsulun Pay Bölgüsü Sazişinin iştirakçıları sırasında SOCAR (31,65%) və bp (30,37%) əsas yerləri tutur. Digər tərəfdaşlar isə bunlardır: MOL 9,57%, INPEX 9,31%, ExxonMobil 6,79%, TPAO 5,73%, ITOCHU 3,65% və ONGC Videsh 2,92%. AÇG layihəsindəki pay bölgüsü beynəlxalq əməkdaşlığın vacibliyini göstərir.