Makron Konqo ilə "M23" arasında əldə olunan sazişi alqışlayıb

Fransa Prezidenti Emmanuel Makron Konqo Demokratik Respublikası (KDR) ilə üsyançı Konqo Çay Alyansı ("M23" hərəkatını da əhatə edir) arasında Qətərin paytaxtı Dohada imzalanmış çərçivə sazişini alqışlayıb. Emmanuel Makron bildirib ki, bu razılaşma bölgədəki uzun sürən əzablara son qoymağa kömək edəcək və sülhə doğru atılmış vacib bir addımdır.

Dövlət başçısı öz münasibətini "X" sosial şəbəkəsində yayımladığı yazıda bildirib. O qeyd edib ki, bu saziş hamı üçün bir ümid işığıdır. Fransanın prezidenti konstruktiv yanaşmaları üçün bütün tərəflərə minnətdarlığını bildirib. O, həmçinin Qətərin bu danışıqlarda oynadığı rolu yüksək qiymətləndirib. Makron paylaşımında Fransanın regionda sülh naminə daima çalışmağa hazır olduğunu vurğulayıb.

Sülh müqaviləsinə dair Dohada imzalanmış çərçivə sazişi noyabrın 15-də Konqo Demokratik Respublikası və Konqo Çay Alyansının nümayəndələri tərəfindən imzalanıb. Bu sənədin əsas məqsədi Konqonun şərqindəki silahlı toqquşmaları dayandırmaqdır. Həmin toqquşmalar minlərlə insanın həyatına son qoyub və yüz minlərlə sakinin evlərini tərk etməsinə səbəb olub. Konqo Demokratik Respublikasında sabitliyin bərpası beynəlxalq ictimaiyyətin əsas hədəflərindən biri sayılır.