Mask tarixdə bir ilkə imza atıb - sərvəti 500 milyard doları ötüb

Amerikalı sahibkar və milyarder Elon Mask dünya tarixində ən böyük şəxsi sərvətə imza atdı. O, tarixdə ilk dəfə olaraq $500 milyard sərvət həddini keçən insana çevrilib. Bu nəhəng nailiyyət son dövrlərdə onun maliyyə vəziyyətində ciddi dəyişikliklərin baş verdiyini göstərir.

Maskın sərvəti əvvəlcə $500 milyard səviyyəsinə qalxsa da, dərhal sonra bir qədər azaldı və $499,1 milyarda düşdü. Bu böyük artımın əsas səbəbi “Tesla” şirkətinin səhmlərinin təxminən 14 faiz dəyər qazanması oldu. Səhmlərin bu şəkildə bahalaşması Maskın şəxsi vəziyyətini xeyli yaxşılaşdırdı, çünki o, elektrik avtomobil şirkətinin 12%-inə sahibdir.

Milyarderin sərvəti tək “Tesla” ilə məhdudlaşmır. Mask, kosmik nəhənglər olan “SpaceX” və yeni yaradılan texnologiya şirkəti “xAI” kimi müəssisələrin də böyük pay sahibidir. Bu şirkətlər sahibkara illik qaydada yaxşı gəlir gətirir. Onun maliyyə gücü beynəlxalq reytinqlərdə də öz əksini tapır. Sentyabrın əvvəlində “Forbes” jurnalı Maskı dünyanın və ABŞ-ın ən varlı insanları siyahısında dördüncü il ardıcıl olaraq birinci yerdə göstərib.