"Mastercard" açıq dövrəli nəqliyyat ödənişləri ilə Azərbaycanda mobilliyin gələcəyinə töhfə verir

“Mastercard” nəqliyyat ödənişləri sahəsində on ildən artıq qlobal təcrübəyə malikdir və bu sahədə yeni standartlar müəyyən edir. Şirkətin açıq dövrəli həlləri hazırda dünyanın 300-dən çox şəhərində uğurla işləyir və bu şəbəkə sürətlə genişlənir. Bu sistemin əsas məqsədi şəhər mobilliyini daha əlverişli, rahat və səmərəli etməkdir.

Bakı da indi bu müasirləşmənin növbəti mərhələsinə doğru addım atır. Şəhər ictimai nəqliyyatı açıq dövrəli ödənişlərin qəbuluna hazırlaşır. Bu yenilik sərnişinlərin “Mastercard” kartları və ya mobil cihazları ilə rahat şəkildə ödəniş etməsinə imkan yaradacaq. Bakıda ictimai nəqliyyatda kartla ödənişlərin tətbiqinə metro stansiyalarından başlanılıb. Növbəti mərhələdə bu sistemin şəhər avtobuslarını da əhatə edəcəyi gözlənilir. Bakı metropolitenində kartla ödənişlərin istifadəyə verilməsi şəhərin qlobal miqyasda tanınan ağıllı mobillik modelinə doğru irəliləməsi üçün vacib bir addım sayılır.

Açıq dövrəli (Open Loop) sistem ənənəvi qapalı dövrəli kart sistemləri üzərində bir sıra üstünlüklər verir. Ənənəvi sistemlərdə sərnişinlərin ayrıca nəqliyyat kartı alması və onu mütəmadi olaraq balansla doldurması tələb olunur. Açıq dövrəli model isə istifadəçilərə artıq sahib olduqları debet və ya kredit kartlarından, həmçinin telefonlarından və ya geyilə bilən cihazlarından ödəniş üçün istifadə etməyə imkan verir. Əlavə bir kart almaq ehtiyacı yoxdur. Sadəcə kartı və ya telefonu validatora yaxınlaşdırmaq yetər. Bu, vaxt itkisinin və vəsait itirmək riskinin qarşısını alır. Bu sadəlik həm yerli sərnişinlər, həm də şəhərə gələn turistlər üçün ödəniş prosesini maksimum dərəcədə asanlaşdırır.

“Mastercard”ın açıq dövrəli həlləri dünyanın bir çox aparıcı şəhərində effektivliyi sübut edib. Məsələn, London təmassız ödənişlərin dominant üsula çevrildiyi ilk şəhərlərdən biridir; burada gündəlik milyonlarla əməliyyat aparılır və idarəetmə xərcləri azalıb. Hollandiyada ölkə üzrə vahid açıq sistem yaradılıb, beləliklə, sərnişinlər qatar, avtobus və tramvayda eyni kartdan istifadə edə bilir. Sinqapurda Yerüstü Nəqliyyat İdarəsinin “Mastercard” ilə əməkdaşlığı bütün əsas nəqliyyat növlərində rahat ödəniş imkanları yaratmışdır. Nyu-York, Sidney və Milan kimi şəhərlər də bu sistemləri tətbiq edərək həm şəhərlərin əməliyyat xərclərini azaldıb, həm də sərnişin təcrübəsini əhəmiyyətli dərəcədə yaxşılaşdırıb.

Rəqəmsal ödənişlər nəqliyyat sistemlərində nağd pul dövriyyəsini azaldır. Bu, prosesləri avtomatlaşdırır, fırıldaqçılıq risklərini minimuma endirir və sərnişinlər üçün yüksək səviyyədə rahatlıq təmin edir. “Mastercard” ödəniş texnologiyaları və şəhər inkişafı arasında əlaqə quraraq daha ağıllı, davamlı və əlaqəli mobillik ekosisteminin yaradılmasına dəstək verir. Azərbaycanın ictimai nəqliyyat sisteminin açıq dövrəli ödənişlərə keçməsi şəhər mobilliyinin gələcəyini formalaşdırmaq üçün mühüm bir addım atmaq deməkdir.