Mərkəzi Asiya ölkələri tərəfindən konsultativ format çərçivəsində yekun qərarın qəbul edilməsi tarixi əlaqələrimizin siyasi formata çevrilməsi deməkdir - Hikmət Hacıyev

Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev ölkəmizlə Mərkəzi Asiya dövlətləri arasındakı əlaqələrin yeni mərhələyə keçdiyini bildirib. Daşkənddə jurnalistlərlə söhbət edən Hacıyev, Azərbaycanı region ölkələri ilə tarixi, mədəni və mənəvi bağların birləşdirdiyini qeyd etdi. O, bu sıx əlaqələrə əsaslanaraq, son dövrlərdə Mərkəzi Asiya ölkələri ilə Azərbaycan arasındakı münasibətlərin dinamik inkişafını aydın şəkildə müşahidə etdiklərini vurğulayıb.

Hacıyev əlaqələrin genişlənməsinin bariz nümunələrini sadalayıb. Prezident İlham Əliyevin region ölkələrinə intensiv səfərləri, həmçinin region liderlərinin Azərbaycana tez-tez gəlişləri bu əlaqələrin gücləndiyini göstərir. Beynəlxalq təşkilatlar çərçivəsində fəaliyyətimiz də Azərbaycanla Mərkəzi Asiya ölkələri arasında genişlənən əlaqələrin göstəricisidir. O bildirib ki, Mərkəzi Asiya ölkələri tərəfindən konsultativ format çərçivəsində yekun qərarın qəbul edilməsi tarixi əlaqələrimizin birbaşa siyasi formata çevrilməsi deməkdir.