Norveçdə Zəfərin beşinci ili qeyd olunub

Norveçin paytaxtı Osloda "Şanlı Zəfər" adlı tədbir təşkil edilib. Bu qeyd etmə Azərbaycanın Diasporla İş üzrə Dövlət Komitəsinin və Oslo Azərbaycan Evinin dəstəyi və təşkilatçılığı ilə baş tutub. Tədbir 8 Noyabr – Zəfər Gününün tarixi və mənəvi əhəmiyyətini vurğulamaq məqsədi daşıyırdı. Mərasimdə ilk olaraq Azərbaycan Dövlət Himni səsləndirildi. Şəhidlərin əziz xatirəsi bir dəqiqəlik sükutla yad edildi, eyni zamanda Şanlı Zəfərə həsr olunmuş xüsusi videoçarx nümayiş olundu. Oslo Azərbaycan Evinin rəhbəri Ramil Əliyev çıxış edərək bu günün xalqımız və dövlətimiz üçün böyük qürur mənbəyi olduğunu bildirib.

Qeyd etmə proqramı çərçivəsində Azərbaycanın tanınmış incəsənət ustaları çıxış etdilər. Əməkdar artistlər Elçin Abbasov (tar) və Toğrul Əsədullayev (kamança), opera solisti Orxan Cəlilov, eləcə də xanəndə Rəvan Qaçayev (VII Muğam Televiziya Müsabiqəsinin laureatı) səhnəyə çıxdılar. Orxan Cəlilovun xalq, türk və estrada, Rəvan Qaçayevin isə muğam, aşıq və estrada janrlarını birləşdirən ifaları iştirakçılar tərəfindən böyük maraqla qarşılandı. Rəqqas Firuz Əliyev və rəqqasə Cəmilə Listkova, milli geyimlərdə çıxış edən digər rəqqaslar zərifliyi və rəngarəngliyi ilə diqqət çəkdilər. Norveç Azərbaycanlıları Gənclər Təşkilatının fəal üzvü Arvin Balanjinin pianoda ifası da alqışlarla qarşılandı. Teleaparıcı Dilarə Əliyeva da Zəfərə həsr etdiyi monoloqla tədbirə xüsusi rəng qatdı. Bundan başqa, rəssam Nərminə Vəliyevanın “Güclü ruhlara ithaf – Qarabağ kolleksiyası” adlı sərgisi nümayiş olundu.

Tədbir boyu salonda Zəfər ruhu hakim idi, incəsənət ustalarının çıxışları iştirakçılarda coşqu yaratdı. Milli musiqilərin sədaları altında rəqslər tədbirə xoş ovqat bəxş etdi. Dostluq, qürur və vətənpərvərlik ruhu ilə yekunlaşan mərasimin sonunda iştirakçılara Azərbaycanın milli şirniyyatları təqdim edildi.