Növbəti köç karvanı Ağdamın Xıdırlı kəndinə çatıb, 24 ailəyə mənzillərin açarları təqdim olunub - YENİLƏNİB

Prezident İlham Əliyevin tapşırığına əsasən həyata keçirilən “Böyük Qayıdış” Proqramı çərçivəsində keçmiş məcburi köçkünlərin azad edilmiş ərazilərə dönüşü davam edir. Oktyabrın 31-də yola düşən növbəti köç karvanı Ağdam rayonunun Xıdırlı kəndinə çatdı. Bu köç mərhələsi uzun müddət müvəqqəti yaşayış məntəqələrində qalmış sakinlər üçün xüsusi əhəmiyyət daşıyır. Köçkünlər əsasən respublikanın müxtəlif yerlərindəki yataqxanalarda, sanatoriya və inzibati binalarda məskunlaşmışdılar.

Qayıdış proqramı çərçivəsində Xıdırlı kəndində 124 nəfərdən ibarət 24 ailəyə yeni mənzillərin açarları təqdim edildi. Mənzillərin təqdimat mərasimində dövlət qurumlarının nümayəndələri iştirak etdilər. Tədbirdə Qaçqınların və Məcburi Köçkünlərin İşləri üzrə Dövlət Komitəsinin nümayəndələri, eləcə də Ağdam, Füzuli və Xocavənd rayonlarında Azərbaycan Respublikası Prezidentinin xüsusi nümayəndəliyinin təmsilçiləri yer aldılar.

Doğma yurdlarına qayıdan sakinlər dövlətin onlara göstərdiyi hərtərəfli qayğıya görə Prezident İlham Əliyevə və Birinci vitse-prezident Mehriban xanım Əliyevaya dərin minnətdarlıqlarını çatdırdılar. Onlar həmçinin torpaqları işğaldan azad edən rəşadətli Azərbaycan Ordusuna minnətdarlıqlarını bildirdilər. Sakinlər qəhrəman əsgər və zabitlərə təşəkkür etdi, bu yolda canlarından keçən şəhidlərə rəhmət diləklərini ifadə etdilər.