Növbəti köç karvanı Cəbrayılın Horovlu kəndinə çatıb: açarlar təqdim olunub (YENİLƏNİB)

Növbəti köç karvanı bu gün Cəbrayıl rayonunun Horovlu kəndinə çatıb. Onlara evlərinin açarları təqdim edilib. Bu mərhələdə 47 ailə olmaqla, 189 nəfər doğma yurdlarına qayıdıb.

Bu köç prosesi "Azərbaycan Respublikasının işğaldan azad edilmiş ərazilərinə Böyük Qayıdış Proqramı"na əsasən həyata keçirilir. Səhər saatlarında yola düşən ailələr uzun illərdən sonra öz evlərinə qovuşmanın sevincini yaşayıblar. Qeyd edək ki, qayıdan ailələr respublikanın fərqli ərazilərində – yataqxana, sanatoriya, inzibati binalar kimi müvəqqəti yaşayış yerlərində məskunlaşmışdılar. Açarların təqdim olunması mərasimində Cəbrayıl, Qubadlı və Zəngilan rayonlarında Prezidentin xüsusi nümayəndəliyinin, Qaçqınların və Məcburi Köçkünlərin İşləri üzrə Dövlət Komitəsinin əməkdaşları, eləcə də digər rəsmi şəxslər iştirak ediblər.

Horovlu kəndinə köçən ailələr qarşılandıqdan sonra Azərbaycan Respublikasının Minatəmizləmə Agentliyinin (ANAMA) əməkdaşları onlara təhlükəsizlik barədə məlumat veriblər. ANAMA nümayəndələri mina və partlamamış hərbi sursatların yaratdığı təhlükələr haqqında ətraflı danışdılar. Ailələrə tanımadıqları naməlum əşya və cisimlərdən uzaq durmaları tövsiyə edildi. Belə hallar aşkarlandıqda isə dərhal aidiyyəti qurumlara məlumat vermək vacibdir. Bu cür məlumatlandırma prosesi sakinlərin təhlükəsizliyini təmin etmək baxımından əhəmiyyətli sayılır. Sakinlər sevinclə açarları qəbul edərək öz yeni evlərində məskunlaşıblar.

Qayıdan sakinlər Horovlu kəndində görülən genişmiqyaslı bərpa işlərinin şahidi olublar. Kəndin ümumi sahəsi 248 hektardır; birinci mərhələdə 94 hektar ərazidə 334 fərdi ev inşa edilib. Evlər 2, 3, 4, və 5 otaqlıdır. Onlar müasir kommunikasiya şəbəkəsi – su, işıq, qaz, Günəş panelləri və yüksəksürətli internetlə təmin edilib. Kəndin daxili yollarına asfalt döşənib. Burada 624 şagird yerlik məktəb binası, 220 yerlik uşaq bağçası, ikimərtəbəli inzibati bina, bazar kompleksi, tibb məntəqəsi və idman-sağlamlıq mərkəzi kimi sosial obyektlər də tikilib. İşğal dövründə dağıdılmış “Əsgər”, “Şığı”, “Orta” kimi tarixi kəhrizlər də bərpa olunub. Doğma yurdlarına qayıdan sakinlər göstərilən dövlət qayğısına görə Prezident İlham Əliyevə və Birinci vitse-prezident Mehriban xanım Əliyevaya təşəkkürlərini bildiriblər. Onlar, eyni zamanda, torpaqlarımızı azad edən Azərbaycan Ordusuna minnətdarlıqlarını ifadə ediblər.