Orban: Rusiya və ABŞ-nin sammitə qədər həll etməli olduğu bir neçə məsələ qalıb

Macarıstanın Baş naziri Viktor Orban bildirib ki, Rusiya və ABŞ-nin Ukrayna müharibəsi ilə bağlı mövqelərini razılaşdırmaq üçün həll etməli olduğu cəmi bir-iki məsələ qalıb. Bu razılaşma iki ölkənin prezidentləri Vladimir Putinlə Donald Tramp arasında Budapeştdə görüş keçirmək imkanı yaradacaq. Orban bu məlumatı "Magyar Nemzet" qəzetinə verdiyi qısa müsahibədə açıqlayıb.

Baş nazir izah edib ki, hazırda ABŞ-Rusiya danışıqlarında həll olunmamış qalan müəyyən məsələlər var. Əgər bu problemlər aradan qaldırılsa, Budapeştdə sülh sammiti bir neçə gün ərzində baş tuta bilər. Orban vurğulayıb ki, bu görüşdən sonra, tərəflərin razılığından asılı olaraq, Ukraynada atəşkəs elan oluna və sülh bərqərar edilə bilər. O, sammitin tezliklə keçiriləcəyinə ümid etdiyini dilə gətirib.

Viktor Orban həmçinin Vaşinqtona səfər etdiyini və Ağ Evlə danışıqların əsas mövzularından birinin Ukrayna münaqişəsinin həlli yolları olacağını qeyd edib. Macarıstan hökumətinin başçısı növbəti Rusiya-Amerika sammitinin məhz Budapeştdə baş tutacağına böyük ümid bəslədiyini bildirib.