Ötən gün yanğının baş verdiyi binanın sakinləri hələ də evlərinə buraxılmayıb - FOTO

Ötən gün paytaxtın Yasamal rayonu, Mirəli Seyidov 19 A ünvanında yerləşən çoxmərtəbəli yaşayış binasında güclü yanğın baş verdi. Hadisədən bir gün keçməsinə baxmayaraq, binada yaşayan sakinlər hələ də evlərinə buraxılmır.

Bu məhdudiyyətin əsas səbəbi yanğının binanın kommunal təsərrüfatlarına, xüsusən də elektrik enerjisi sisteminə ciddi ziyan vurmasıdır. Əldə edilən məlumata görə, elektrik təsərrüfatı tamamilə sıradan çıxdığı üçün sakinlərin geri qayıtması təhlükəli hesab edilir.

Hazırda bina və ətraf ərazi polis əməkdaşları tərəfindən nəzarətdə saxlanılır. Bu nəzarət həm ərazidə asayişi qorumağa, həm də təhlükəsizlik tədbirlərini həyata keçirməyə kömək edir. Qeyd olunur ki, yaşayış binasının alt mərtəbəsində fəaliyyət göstərən restoran da hadisə ilə əlaqədar öz işini müvəqqəti olaraq dayandırıb.