Özbəkistan Azərbaycan modeli üzrə sahibkarlara dəstək mərkəzləri yaradacaq

Özbəkistan Prezidenti Şavkat Mirziyoyev ölkədə sahibkarlara dəstək sistemini yenidən qurmaq məqsədilə Azərbaycanın nümunəsini təsdiqləyib. Bu qərar nəticəsində Ticarət və Sənaye Palatası nəzdində "Biznes hamroh" adlı xüsusi mərkəzlər yaradılacaq. Palatanın sədri Davron Vahabov bu barədə məlumat verərək, yeni sistemin sahibkarların işini əhəmiyyətli dərəcədə asanlaşdıracağını bildirib. Mərkəzlər Azərbaycanın təcrübəsindən faydalanaraq "bir pəncərə" sistemi kimi işləyəcək. Bu yanaşma kiçik və orta biznes nümayəndələrinin bir çox rəsmi prosedurları tez bir zamanda həll etməsinə imkan verəcək.

Davron Vahabov mərkəzlərin Palata daxilində təsis ediləcəyini və bütün xidmətləri vahid elektron platforma üzərindən göstərəcəyini qeyd edib. Sahibkarların daim müraciətlərini qəbul etmək üçün 24 saatlıq çağrı mərkəzi də fəaliyyətə başlayacaq. Hər regionda yaradılması planlanan "Biznes hamroh" mərkəzləri mühasibatlıq, vergi, ixrac, bank, sığorta və sertifikatlaşdırma sahələrində bütün vacib xidmətləri birləşdirəcək. Mərkəzlər həmçinin istehsalçılar arasında əməkdaşlığın qurulmasına yardım edəcək. Vahabov bu sistem sayəsində sahibkarların problemlərinin təxminən 80 faizini tək bir yerdə həll edə biləcəyini söyləyib.

Mərkəzlərin açılışı mərhələli şəkildə aparılacaq. Birinci mərhələdə "Biznes hamroh" mərkəzləri Cizax, Fərqanə və Əndican bölgələrində yaradılacaq. Bu layihələrin maliyyələşdirilməsi üçün Özbəkistan hökuməti tərəfindən 200 milyard som (təqribən 16,7 milyard dollar) ayrılıb. Yeni mərkəzlər müasir standartlara cavab verməsi üçün tamamilə modernləşdiriləcək mövcud binalarda yerləşəcək. Bu addım Özbəkistanın biznes mühitinə dövlət dəstəyini artırmaq və yerli sahibkarlar üçün iş şəraitini yaxşılaşdırmaq məqsədi daşıyır.