"Para" BOKT-dan ƏSF-yə ötürülmüş kreditlər üzrə ödəniş imkanları genişlənib

“Para” ASC bank olmayan kredit təşkilatının (BOKT) kredit portfelinin Əmanətlərin Sığortalanması Fondu (ƏSF) tərəfindən idarə olunan hissəsi üzrə ödəniş üsulları genişləndi. Bu portfelə aid olan borcalanlar indi kredit ödənişlərini “MilliÖn” ödəniş terminalları və mobil tətbiqi vasitəsilə də yerinə yetirə bilərlər. “MilliÖn” ölkə üzrə geniş xidmət şəbəkəsinə malikdir. Bu yenilik borcalanlara göstərilən xidmətlərin daha əlçatan, rahat və çevik şəkildə həyata keçirilməsinə imkan yaradır.

Ödəniş sisteminin infrastrukturu daha rahat oldu. "MilliÖn" ödəniş sistemi ölkənin bütün inzibati ərazi vahidlərini əhatə edən terminallar şəbəkəsinə malikdir. Bundan əlavə, onun mobil tətbiqi də var. Bu imkanlar borcalanlara kömək edir ki, kredit ödənişlərini həm terminallar vasitəsilə, həm də onlayn platforma üzərindən günün 24 saatı, həftənin 7 günü istənilən yerdən rahat şəkildə həyata keçirsinlər. Borcalanlar bilməlidir ki, “MilliÖn” vasitəsilə edilən ödənişlər real vaxt rejimində sistemdə görünür, bu da ödəniş prosesini sürətli və etibarlı edir.

“MilliÖn” ödəniş terminalları vasitəsilə əməliyyatı tamamlamaq üçün sadə addımlar atılmalıdır. Borcalan terminalda və ya mobil tətbiqdə Əmanətlərin Sığortalanması Fondunu - ADİF subbölməsini seçməlidir. Daha sonra müvafiq xanaya FİN kod və ya VÖEN daxil edilməli, siyahıdan “Para” BOKT və hesabı seçilməlidir. Nəhayət, ödəniş məbləği təsdiqlənərək əməliyyat başa çatdırılmalıdır.

Bu borcalanlar üçün əlavə ödəniş üsulu da mövcuddur. Onlar kredit ödənişlərini "Azərpoçt" MMC-nin ölkə üzrə xidmət şəbəkəsi vasitəsilə də edə bilərlər. Borclarını ödəmək istəyənlər "Azərpoçt" filial və şöbələrinə yaxınlaşaraq, ödəniş etdikləri bankın adını, öz şəxsiyyət vəsiqələrini və fərdi identifikasiya nömrələrini (FİN) təqdim etməlidirlər. Bu yolla ödənişlər Manat, ABŞ dolları və Avro valyatalarında həyata keçirilə bilər. ƏSF borcalanlar üçün xidmətlərin keyfiyyətini və əlçatanlığını artırmaq məqsədilə ödəniş üsullarını təkmilləşdirməyə davam edəcək.