Perinatal Mərkəzdə 7 körpənin öldüyü yanğınla bağlı şahid məhkəməyə məcburi gətiriləcək

“Respublika Perinatal Mərkəzi”ndə baş verən yanğın nəticəsində 7 körpənin ölümü ilə bağlı ittiham olunan direktor və şöbə rəislərinin cinayət işi üzrə Bakı Ağır Cinayətlər Məhkəməsində növbəti iclas keçirilib. Hakim Leyla Əsgərova-Məmmədovanın sədrliyi ilə keçirilən prosesdə şahidlər dindirildi. İclas zamanı məhkəmə şahid Aqşin Səmədovun məcburi gətirilməsi barədə qərar qəbul edib. Proses dekabrın 15-də davam etdiriləcək.

İclasda müdafiə tərəfi vəsatət təqdim etdi. Təqsirləndirilən Mehriban Abbasquliyevanın vəkili bildirdi ki, yanğından sonra mərkəzdəki körpələr "Yeni Klinika"ya və Kliniki Tibbi Mərkəzə köçürülmüşdü. Bu köçürülmə zamanı Perinatal Mərkəzdən gedən üç əməkdaş Kliniki Tibbi Mərkəzə buraxılmayıb. Vəkil məsələni aydınlaşdırmaq məqsədi ilə bu şəxslərin dindirilməsini məhkəmədən tələb etdi. Lakin dövlət ittihamçısı vəsatəti əsaslı hesab etmədi. Məhkəmə müdafiə tərəfinin bu vəsatətini baxılmamış saxladı.

Yanğın hadisəsi 2024-cü il yanvarın 9-da “Respublika Perinatal Mərkəzi”nin inzibati binasında baş vermişdi. İstintaqla müəyyən olundu ki, Mərkəzin dördüncü mərtəbəsində yerləşən Yenidoğulmuşların intensiv terapiya bölməsində baş verən yanğın 7 yenidoğulmuşun ölümü, 4 nəfərin xəsarət alması və müəssisəyə ümumilikdə 361 min manat məbləğində maddi ziyan dəyməsi ilə nəticələnmişdi. Əsas şübhələrə görə, Mərkəzin direktoru vəzifəsində işləmiş Mehriban Abasquliyeva xəstə qəbulu sayını iki dəfəyədək artırmışdı. Müəssisənin resursları buna imkan vermədiyi halda sayın artırılması elektrik təsərrüfatını artıq yükləyərək sonda yanğına səbəb olub.

Bundan əlavə, Fövqəladə Hallar Nazirliyi Mərkəzdə yoxlamalar aparmışdı. Onlar rəhbərliyə yanğın təhlükəsizliyi qaydalarında nöqsanların olduğunu, xüsusən də avtomatik yanğın siqnalizasiya qurğusunun nasazlığını, daxili yanğın su kranlarının işlək olmamasını və elektrik təsərrüfatındakı problemləri bildirmişdi. Direktor Abasquliyeva, Anesteziologiya şöbəsinin müdiri Hamlet Mustafayev və Dəstək Xidmətləri şöbəsinin müdiri Elnur Əhmədli bu nöqsanları aradan qaldırmamışdılar. Buna görə də M. Abasquliyeva Cinayət Məcəlləsinin 308.2 və 225.3-cü maddələri, H. Mustafayev və E. Əhmədli isə 225.3-cü maddəsi ilə təqsirləndirilən şəxs qismində cəlb ediliblər. Cinayət işi üzrə zərərçəkmiş qismində "Respublika Perinatal Mərkəzi", Elçin Gülmalı oğlu Nəcəfov, Vaqif İntiqam Hacıyev, Aynurə Qalib qızı Əhmədova və Gülbahar Zülfüqarova tanınır.