Perunun keçmiş prezidenti 14 il həbs cəzasına məhkum edilib

Peru məhkəməsi ölkənin keçmiş prezidenti Martin Viskarra barəsində korrupsiya işi üzrə qərar çıxarıb. Məhkəmə Viskarranı ümumilikdə 14 il müddətinə həbs cəzasına məhkum edib.

Məhkəmə iclası RPP radiostansiyası tərəfindən yayımlanmışdı. Hakim bildirib ki, Viskarra bir maddə üzrə səkkiz il, digər maddə üzrə isə altı il cəza alıb. Bütün cinayətlər birləşdirildikdə, "ümumi cəza 14 ildir". Hakim həmçinin bu cəzanın qüvvədə qalmalı və dərhal icra edilməli olduğunu vurğulayıb.

İstintaqın versiyasına görə, Martin Viskarra cinayətləri Moquegua departamentinin qubernatoru olarkən törədib. Bu, 2011-ci ildən 2014-cü ilə qədər olan dövrü əhatə edir. O, müxtəlif layihələr üzrə keçirilən tenderlərdə iştirak edən şirkətlərdən rüşvət almaqda ittiham olunurdu. Siyasətçi isə ona qarşı irəli sürülən bütün ittihamları rədd edir və öz təqsirini inkar edir.

Martin Viskarra 2018-ci ilin martında o vaxtkı dövlət başçısı Pedro Pablo Kuçinskinin istefasından sonra prezidentliyə başlamışdı. Lakin onun siyasi fəaliyyəti uzun sürmədi. Peru parlamenti 2020-ci ilin noyabrında Viskarranın prezident vəzifəsindən uzaqlaşdırılmasına səs verdi. Siyasətçi Moqueguadakı korrupsiya sxemlərində iştirakı ilə bağlı məlumatlara görə "mənəvi cəhətdən səriştəsiz" hesab edilmişdi.