Prezident İlham Əliyev ABŞ-nin İsa Məsihin Sonuncu Gün Müqəddəsləri Kilsəsinin nümayəndə heyətini qəbul edib (FOTO)

Azərbaycan Respublikasının Prezidenti İlham Əliyev noyabrın 13-də ABŞ-ın İsa Məsihin Sonuncu Gün Müqəddəsləri Kilsəsinin yüksək səviyyəli nümayəndə heyətini qəbul edib. Bu görüş tərəflər arasında mövcud olan müsbət münasibətləri bir daha təsdiqlədi.

Nümayəndə heyətinə "On İki Həvari Kvorumu"nun üzvü Deyvid Bednar, Yetmişlər Komitəsinin üzvü və Avropa Mərkəzi Ərazi İdarəsinin birinci məsləhətçisi Cek Gerard daxil idi. Heyətdə həmçinin Stirlinq Fondunun prezidenti və idarə heyətinin sədri Mayls Hansen, eləcə də Yetmişlər Komitəsinin Mərkəzi Avropa və Avrasiya üzrə kvorumunun üzvü Pol Pikard da vardı. Söhbət zamanı Prezident İlham Əliyevlə kilsə nümayəndə heyətinin əvvəlki görüşləri məmnunluqla xatırlandı.

Qonaqlar Vaşinqtonda ABŞ Prezidenti Donald Trampın şahidliyi ilə Azərbaycanla Ermənistan arasında sülh gündəliyinin irəli aparılması istiqamətində əldə edilmiş nailiyyətlərə görə təbriklərini çatdırdılar. Dövlət başçısı təbriklərə görə təşəkkür etdi. O, Azərbaycan və Ermənistan arasında Vaşinqtonda əldə olunmuş razılaşmaların tarixi əhəmiyyət daşıdığını və regionun inkişafı üçün mühüm olduğunu vurğuladı. Prezident İlham Əliyev qeyd etdi ki, Donald Trampın yenidən Prezident seçilməsindən sonra Azərbaycan-ABŞ əlaqələri yeni bir mərhələyə keçib. O, bu ilin avqustunda Vaşinqtona səfəri zamanı ikitərəfli münasibətlərin inkişafı ilə bağlı bir sıra mühüm sənədlərin imzalandığını xatırlatdı.

Nümayəndələr kilsənin rəsmi qeydiyyata alınmasına görə Azərbaycan hökumətinə minnətdarlıqlarını bildirdilər. Onlar kilsənin Bakı ofisinin açılışında iştirak edəcəklərini dedilər. Qonaqlar bunu ölkəmizdə bütün dinlərin nümayəndələrinə göstərilən qayğının təzahürü kimi qiymətləndirdilər. Görüşdə Azərbaycanda mədəniyyətlərarası və dinlərarası dialoqun təşviqi ilə bağlı dövlət səviyyəsində görülən işlərdən danışıldı. Həmçinin bu istiqamətdə ölkəmizdə bir çox əhəmiyyətli beynəlxalq tədbirin təşkil edildiyi bildirildi. Tolerantlıq Azərbaycan xalqının həyat tərzi olaraq qeyd edildi. Vurğulandı ki, tarixən ölkəmizdə fərqli dinlərin və xalqların nümayəndələri bir ailə kimi dinc və sülh şəraitində yaşayıblar.