Prokuror: İşgəncənin tətbiqinin Ermənistan dövlətinin siyasətini əks etdirdiyi sübut olunub

Noyabrın 13-də Bakı Hərbi Məhkəməsində Ermənistan Respublikası vətəndaşlarının ittiham olunduğu cinayət işi üzrə proses dövlət ittihamını müdafiə edən prokurorların yekun çıxışı ilə davam etdi. Məhkəmədə verilmiş ittihamlar üzrə əməlin hüquqi qiymətləndirilməsi hissəsi elan olundu. Dövlət ittihamçısı qeyd etdi ki, BMT Təhlükəsizlik Şurasının 822, 853, 874 və 884 saylı qətnamələri Ermənistanın hərbi təcavüzü nəticəsində Azərbaycanın suveren ərazilərini işğal etdiyini təsdiqləyir. Bu qətnamələr Ermənistanın Azərbaycana qarşı təcavüzkar müharibə apardığını sübut edir. İttiham çıxışında həmçinin vurğulanıb ki, Azərbaycana qarşı aparılan bu təcavüzkar müharibə aktiv hərbi əməliyyatların getmədiyi dövrlərdə belə faktiki olaraq dayanmayıb. Bu, Ermənistanın illər boyu davam edən təcavüz siyasətinin göstəricisidir.

Prokurorlar bildiriblər ki, işgəncələrin sistematik və geniş coğrafiyada yayılması onların Ermənistan dövlətinin siyasətini əks etdirdiyini sübut edir. Təcavüzkar müharibə ərzində atəşkəs rejimi dəfələrlə pozulub. Hücum obyektlərinə yalnız Azərbaycan Silahlı Qüvvələrinin qanuni fəaliyyət göstərən üzvləri deyil, həm də mülki şəxslər, onların əmlakları, mülki təyinatlı dövlət obyektləri daxil edilib. Bura dini, təhsil, elm, tibb obyektləri, xəstə və yaralıların yerləşdiyi məkanlar, habelə mühüm strateji əhəmiyyətə malik obyektlər, o cümlədən Bakı-Tbilisi-Ceyhan neft kəməri də çevrilib. Bu hərəkətlər beynəlxalq hüquq normalarını kobud şəkildə pozur və Ermənistanın müharibə cinayətləri törətməsini göstərir.

İttiham tərəfi həmçinin Cenevrə Konvensiyalarına I Əlavə Protokola istinad etdi. Bu sənəd "işğal edən dövlətin öz vətəndaşlarının bir hissəsini işğal etdiyi əraziyə köçürməsini" cinayət hesab edir. Məhkəmə istintaqı zamanı təqsirləndirilən şəxslər – Arayik Harutyunyan, Arkadi Qukasyan və Bako Sahakyan – öz ifadələrində Azərbaycanın işğal altında olan bölgələrinə, xüsusən də Laçın rayonuna Ermənistandan əhalinin köçürülməsi faktını təsdiqləyiblər. Bu faktlar məhkəmə tərəfindən araşdırılan məktublar, erməni mənbələrindən gələn məlumatlar və internetdəki informasiya ehtiyatları ilə də təsdiq olunub. Ermənistan vətəndaşları sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması, soyqırımı, terrorçuluq və hakimiyyəti zorla ələ keçirmə kimi çoxsaylı cinayətlər törətməkdə təqsirləndirilir. Onların məhkəməsi davam edir.