PSJ klubunun futbolçusu "Qızıl oğlan" mükafatının sahibi olub

Fransanın PSJ klubunun hücumçusu Dezire Due nüfuzlu "Qızıl oğlan" mükafatının sahibi oldu. Bu barədə mükafatın təsisçisi olan "Tuttosport" nəşri rəsmi məlumat yayıb. Bu mükafat hər il Avropanın aparıcı çempionatlarında çıxış edən 21 yaşdan kiçik futbolçulara təqdim edilir. Bu fərqlənmə nişanı gənc yaşda yüksək səviyyə göstərən istedadlı futbolçuların karyerasında mühüm rol oynayır.

Due ötən mövsümdə Paris təmsilçisi ilə birlikdə böyük nailiyyətlər qazandı. O, PSJ ilə Fransa çempionu, ölkə kubokunun sahibi və Çempionlar Liqasının qalibi oldu. Dezire Due 2024/2025 mövsümündə turnirin ən yaxşı gənc futbolçusu seçilməyi bacardı. Gənc hücumçu PSJ-nin heyətində keçirdiyi 61 oyunda 16 dəfə fərqlənib və eyni zamanda 16 məhsuldar ötürmə edib. Onun komanda üçün göstərdiyi effektiv performans mükafatı qazanmasında böyük pay sahibi oldu.

Due eyni zamanda yığma komandalar səviyyəsində də medal qazanan futbolçudur. O, Paris-2024-ün gümüş, 2025 Millətlər Liqasının isə bürünc mükafatçısı olub. "Qızıl Oğlan" mükafatı 2003-cü ildə "Tuttosport" qəzeti tərəfindən yaradılmışdı. Qeyd edək ki, bu mükafatın 2024-cü ildəki qalibi isə "Barselona"nın ispaniyalı hücumçusu Lamin Yamal olmuşdu.