Qarabağ Universitetində “Mənəvi Dəyərlər” Günü Təntənəli Şəkildə Keçirilib

Vətən müharibəsində qazanılan Qüdrətli Zəfərin beşinci ildönümünə həsr edilmiş “Mənəvi dəyərlər” həftəsi çərçivəsində Qarabağ Universitetində əlamətdar “Mənəvi dəyərlər” günü təşkil edilib.

Tədbiri giriş sözü ilə açan Qarabağ Universitetinin rektoru Şahin Bayramov, bu günün məhz Qarabağ Universitetində keçirilməsinin rəmzi və strateji önəm daşıdığını xüsusi olaraq vurğulayıb.

Xankəndi şəhərində, eləcə də Ağdərə və Xocalı rayonlarında Azərbaycan Respublikası Prezidentinin xüsusi nümayəndəsi Elçin Yusubov Zəfərimizin beşinci ildönümü münasibətilə “Mənəvi dəyərlər” həftəsinin təşkilini yüksək qiymətləndirib. O, çıxışında həmçinin Prezident İlham Əliyevin rəhbərliyi altında işğaldan azad edilmiş ərazilərdə gerçəkləşdirilən genişmiqyaslı quruculuq layihələri və “Böyük Qayıdış” proqramı haqqında ətraflı məlumat verib.

Dini Qurumlarla İş üzrə Dövlət Komitəsinin sədri Ramin Məmmədov qeyd edib ki, Prezident İlham Əliyevin rəhbərliyi ilə Qarabağ və Şərqi Zəngəzurda həyata keçirilən bərpa-quruculuq işləri təkcə sosial-iqtisadi və siyasi əhəmiyyət daşımır, həm də dərin mənəvi məzmun kəsb edir.

Rəsmi çıxışlar başa çatdıqdan sonra tədbir elmi mühazirələrlə davam etdirilib.

Daha sonra tələbə və müəllimlərin iştirakı ilə bədii proqram təqdim olunub. Konsertdə Azərbaycan musiqi mədəniyyətinin klassik və xalq irsini əks etdirən ecazkar ifalarla yanaşı, dünya musiqi nümunələrindən parçalar da səsləndirilib.

Tədbirin sonunda iştirakçılar Xocalının Ballıca kəndinə yollanaraq ağacəkmə aksiyasında iştirak ediblər. Bu xeyirxah təşəbbüs çərçivəsində ümumilikdə 200-dən artıq badam ağacı torpağa basdırılıb.