Qarabağda bərpa-quruculuq prosesi orijinal layihələrə əsaslanır - Pakistan Ali Məhkəməsinin vəkili

Pakistan Ali Məhkəməsinin vəkili Muhammad Sohail Sajid, işğaldan azad edilmiş Qarabağda törədilən dağıntıların miqyası haqqında danışıb. O, Qərbi Azərbaycan İcması tərəfindən təşkil edilən III Beynəlxalq Konfransın panel sessiyasında çıxış edib.

Sajid qeyd edib ki, son iki ildə Qarabağa səfər etmiş və həmin ərazilərin işğalçılar tərəfindən tamamilə darmadağın edildiyini görüb. Vəkil həmçinin vurğulayıb ki, işğalın izləri hər yerdə görünür. Ərazinin minalanması yerli əhali üçün ciddi təhlükə olaraq qalır. O bildirib ki, bir çox tarixi abidələr, məscidlər və digər yaddaş məkanları məqsədli şəkildə dağıdılıb.

Dağıntılara baxmayaraq, Muhammad Sohail Sajid bərpa prosesini yüksək qiymətləndirib. Onun sözlərinə görə, Qarabağda aparılan bərpa və quruculuq işləri orijinal layihələrə əsaslanır. Tarixi məhəllələr yenidən qurulur. Bu addımlar bölgədə keçmişi gələcəklə əlaqələndirməyə və yerlərin mədəni kimliyini bərpa etməyə xidmət edir.