Qazaxıstan XİN Xəzər Boru Kəməri Konsorsiumuna hücumu pisləyib

Qazaxıstan Xarici İşlər Nazirliyi (XİN) Xəzər Boru Kəməri Konsorsiumu (XBKK) infrastrukturuna edilən hücuma etirazını bildirib. Bu barədə məlumat ölkənin XİN-in saytında yerləşdirilib. Qazaxıstan hökuməti bu hadisənin Qazaxıstan Respublikası ilə Ukrayna arasındakı ikitərəfli münasibətlərə zərər verən bir akt kimi qiymətləndirildiyini qeyd edir.

Nazirlik bəyanatda bu hadisənin beynəlxalq hüquqla qorunan mülki obyektə qarşı üçüncü təcavüz aktı olduğunu bildirir. Qazaxıstan XİN eyni zamanda, Xəzər Boru Kəməri Konsorsiumunun qlobal enerji sisteminin sabitliyinin qorunmasındakı rolunu xüsusi vurğulayıb. Konsorsiumun fəaliyyəti dünya bazarları üçün böyük əhəmiyyət daşıyır.

Qazaxıstan tərəfi Ukraynadan bu cür hadisələrin təkrarlanmasının qarşısını almaq üçün konkret tədbirlər görməsini gözləyir. Nazirliyin bəyanatında məsələnin diplomatik yollarla həll edilməsinin vacibliyi qeyd olunub.