Qubadlının işğaldan azad olunmasından 5 il ötür

Bu gün Vətən müharibəsi tarixində önəmli yer tutan Qubadlı şəhərinin işğaldan azad edilməsinin 5-ci ildönümüdür. Azərbaycan Ordusunun 2020-ci il sentyabrın 27-də başladığı əks-hücum əməliyyatları nəticəsində Qubadlı şəhəri oktyabrın 25-də erməni işğalından qurtarıldı. Bu azadlıq əməliyyatlarına başlamazdan əvvəl rayonun şərq və cənub hissələrində uğurlu hərbi addımlar atılmışdı. Azərbaycan Silahlı Qüvvələri bölmələri Zəngilan rayonunda qısa müddətdə həyata keçirilən səmərəli əməliyyatlar sayəsində Qubadlı rayonunun inzibati hüdudlarına çıxa bildi. Həmçinin, Cəbrayıl rayonunda düşmən qüvvələrinə sarsıdıcı zərbə vurulması Qubadlının azad edilməsi üçün əsas şəraiti yaratdı.

Qubadlı şəhərinin azad edilməsi uğrunda olduqca şiddətli döyüşlər getdi. Azərbaycan Ordusu düşmənin müqavimətini qırmağı bacardı, onları geri çəkilməyə məcbur etdi və ağır məğlubiyyətə uğratdı. Bu əməliyyatlar zamanı Ermənistan ordusunun xeyli sayda canlı qüvvəsi və hərbi texnikası məhv edildi. Oktyabrın 26-da dövlət başçısı xalqa müraciət edərək Vətən müharibəsində bir aya yaxın müddətdə ələ keçirilən qənimətləri və məhv edilmiş düşmən texnikasını açıqladı. Eyni zamanda, o, oktyabrın 25-də Qubadlı şəhəri ilə bərabər, genişmiqyaslı kənd ərazilərinin işğalına son qoyulduğunu bəyan etdi. Bu kəndlərə Qubadlı rayonunun Padar, Əfəndilər, Yusifbəyli, Çaytumas, Xanlıq, Sarıyataq, Mollabürhan kəndləri daxil idi. Bundan başqa, həmin gün Zəngilan rayonunun Birinci Alıbəyli, İkinci Alıbəyli, Rəbənd, Yenikənd, eləcə də Cəbrayıl rayonunun Qovşudlu, Sofulu, Dağ Maşanlı, Kürdlər, Hovuslu və Çələbilər kəndləri də işğaldan azad edildi.

Qubadlı 1993-cü il avqustun 31-də Ermənistan Silahlı Qüvvələri tərəfindən işğal edilmişdi. İşğal müddətində ermənilər Qubadlı şəhərini, rayonun kəndlərini dağıtdılar. Onlar dini, tarixi, mədəni abidələrə, qəbiristanlıqlara qarşı vandalizm əməlləri törətmişdilər. İşğalçılar həmçinin rayonun zəngin təbiətinə ciddi ziyan vurdular. Meşələri, nadir ağac və bitki növlərini qırıb yandırmaqla ekoloji terror aktları həyata keçirmişdilər. Azadlıqdan sonra döyüşlərdə iştirak edərək şəxsi igidlik və şücaət nümayiş etdirmiş hərbi qulluqçuların xidmətləri yüksək qiymətləndirildi. Prezident İlham Əliyevin sərəncamı ilə onlar üçün "Qubadlının azad olunmasına görə" medalı təsis olundu və hərbiçilər həmin medalla təltif edildilər.