Qüdsi Osmanovun Rumıniyanın Timişoara şəhərinə rəsmi səfəri baş tutub (FOTO)

Azərbaycan Respublikasının Rumıniyadakı səfiri Qudsi Osmanov dekabrın 5-də Timişoara şəhərinə rəsmi səfər həyata keçirib. O, şəhərin meri və hakim koalisiada təmsil olunan “Rumıniya Xilaskərlar Birliyi” (USR) partiyasının sədri Dominik Fritslə görüş keçirdi. Bu görüşdə iki şəhər arasında əlaqələrin yeni səviyyəyə qaldırılması və ikitərəfli iqtisadi əməkdaşlığın inkişafı imkanları müzakirə edildi. Tərəflər mümkün əməkdaşlıq sahələrini nəzərdən keçirərək, bu əlaqələrin qarşılıqlı faydalı olacağını bildirdilər. Səfir Osmanov Rumıniya və Azərbaycan əlaqələrinə toxunaraq, iki ölkənin regionları arasında əməkdaşlığın vacibliyindən danışdı.

Qudsi Osmanov Timişoaranın unikal xüsusiyyətlərini vurğuladı. O, şəhərin multikultural xarakterini, beynəlxalq əməkdaşlığa açıq olmasını, habelə gənclərin ictimai həyatda fəallığını və özünəməxsus memarlıq nümunələrini qeyd etdi. Səfirə görə, bu amillər Timişoaranın 2023-cü ildə Avropanın Mədəniyyət Paytaxtı statusu almasına, beynəlxalq səviyyədə tanınmasına və mədəni potensialının önə çıxmasına mühüm töhfə verib. Mer Dominik Frits isə Timişoaranın “şəhər diplomatiyası” konsepsiyasına sadiq qaldığını və Azərbaycanla münasibətləri möhkəmləndirməkdə maraqlı olduğunu ifadə etdi. Şəhər rəhbəri Avropa Dəyərləri Mükafatı və hər il təşkil olunan Timişoara Şəhər Sammiti haqqında məlumat verdi. O, bu tədbirlərin şəhəri Avropa dəyərləri və müzakirələri ilə əlaqələndirən təşəbbüslər olduğunu bildirdi.

Səfər çərçivəsində diplomatik görüşlərlə yanaşı, humanitar və dini ziyarətlər də yer aldı. Rumıniyada dövlət səviyyəsində qeyd edilən Milad bayramı və Müqəddəs Nikolay günü ərəfəsində səfir, XX əsrin ortalarında tikilmiş “Müqəddəs Üç Hiyerarx” kilsəsini ziyarət etdi. Bu kilsə Rumıniyanın ən mühüm dini məbədlərindən biri hesab edilir. Bundan əlavə, Qüdsi Osmanov Timişoara Bələdiyyə Sosial Yardım İdarəsinə tabe olan "Inokentsiu Klein" “Qocalar Evi”ni də ziyarət etdi. Azərbaycanlı diplomat “Qocalar evi”nin sakinləri ilə səmimi söhbət etdi. O, Azərbaycanın Rumıniyadakı səfirliyi adından onlara kiçik bayram hədiyyələri və şirniyyatlar təqdim etdi.

Timişoara Rumıniyanın ən inkişaf etmiş şəhər mərkəzlərindən biri sayılır. Şəhər rəqabətqabiliyyətli sənayesi, İT sektoru, memarlıq irsi və multikultural mədəniyyəti ilə geniş tanınır. Əhali və ərazi baxımından ölkədə üçüncü yerdə olan bu şəhərin tarixi önəmi böyükdür. Timişoara Rumıniyada azadlıq və demokratiyanın rəmzi sayılır, çünki 1989-cu il inqilabı məhz bu şəhərdən başlayıb. Səfirin bu ziyarəti iki ölkə arasında əlaqələrin dövlət səviyyəsindən kənara çıxaraq, şəhərlərarası və mədəni müstəvidə də inkişaf etdirilməsi niyyətini göstərir.