Qvineya-Bisauda hərbçilər ölkəni idarə etmək üçün ali komandanlıq yaradıblar – YENİLƏNİB

Qvineya-Bisauda dövlət çevrilişi nəticəsində hakimiyyəti ələ keçirən hərbçilər ölkəni idarə etmək üçün yeni ali orqan təsis ediblər. Onlar bu qurumu "İntizamın bərpası üzrə Ali hərbi komandanlıq" adlandırdılar. Bu barədə briqada generalı Denis N'Kanya milli televiziyada çıxışı zamanı məlumat verdi. Generalın sözlərinə görə, bu komandanlıq ölkəni müvəqqəti əsaslarla idarə edəcək. Hələlik bu strukturun kimin rəhbərliyi altında fəaliyyət göstərəcəyi açıqlanmayıb.

Hərbi rəhbərlik ölkə üzərində tam nəzarət qurduğunu elan etdi və dərhal bütün mülki institutların fəaliyyətini dayandırdı. Onlar Qvineya-Bisaunun xarici sərhədlərini bağladılar, gecə vaxtı komendant saatı tətbiq etdilər və KİV-lərin işini dayandırdılar. Ən ən başlıcası isə, 23 noyabrda keçirilmiş prezident və parlament seçkilərinin səslərinin sayımını dayandırmaq oldu. Mərkəzi Seçki Komissiyası bu nəticələri noyabrın 28-də elan etməyi planlaşdırırdı. Bu hərbi müdaxilə seçki prosesinin yarımçıq qalmasına səbəb oldu.

Çevriliş zamanı ölkənin yüksək səviyyəli rəsmiləri həbs olundu. Mövcud prezident Umaro Sissoko Embalo dövlət çevrilişi nəticəsində həbs edilənlərdən idi. Onunla birlikdə daxili işlər naziri Boçe Kande, Baş Qərargah rəisi və onun müavini də saxlanıldı. Həmçinin, aparıcı müxalifət partiyası – Qvineya və Kabо-Verdenin Afrika Müstəqillik Partiyasının lideri Dominquş Simoyş Pereyra və partiyanın prezidentliyə namizədi Fernandu Diaş de Koşta da həbs olundu. Onların harada saxlanıldığı məlum deyil. Hökumətin aparıcı simalarının həbsi ölkədə ciddi siyasi qeyri-müəyyənlik yaratdı.

Hadisələrin başlanğıcı noyabrın 26-da paytaxtdakı atışmalarla əlaqəli idi. Günorta saatlarında prezident sarayı yaxınlığında atəş səsləri eşidilməyə başladı, bu atışma günün ikinci yarısına doğru səngidi. Hərbi geyimdə olan şəxslər saraya gedən əsas yolu nəzarətə götürmüşdülər. Atışma həmçinin, Milli Seçki Komissiyasının binası yaxınlığında da qeydə alındı. Maraqlıdır ki, bu hadisələri elan edən general N'Kanya çevrilişdən əvvəl prezidentin hərbi kargüzarlığının rəhbəri vəzifəsində idi və dövlət başçısının şəxsi təhlükəsizliyinə cavabdeh idi. Seçkilərin rəsmi nəticələri gözlənilmədən, həm Embalo, həm də müxalifət namizədi eyni vaxtda öz qələbələrini elan etmişdilər.