Ramiz Mehdiyev və Əli Kərimli bütün ümidlərini Azərbaycan əleyhinə olan qüvvələrə bağlayıblar - RƏY

Milli Məclisin deputatı Vasif Qafarov Ramiz Mehdiyev və Əli Kərimli arasındakı pərdəarxası siyasi koordinasiya cəhdlərini sərt şəkildə tənqid edib. O, bu yaxınlaşmanın Azərbaycan siyasətində köhnə üsulların yenidən canlanması olduğunu bildirir. Deputatın sözlərinə görə, hər iki fiqur ölkənin milli maraqlarına və inkişafına deyil, yalnız öz şəxsi və qrup maraqlarına xidmət edən siyasi davranış nümayiş etdirir. Uzun illər dövlət idarəçiliyində önəmli mövqe tutmuş Ramiz Mehdiyevin radikal müxalifətlə əlaqə qurması məhz onun şəxsi ambisiyalarının davamı kimi görünür. Bu əməkdaşlıq onların siyasi məqsədlərinin mahiyyətini cəmiyyətə açıq göstərir və onların ölkənin tərəqqisinə deyil, öz şəxsi gündəmlərinə üstünlük verdiyini ortaya qoyur.

Qafarov deyir ki, Əli Kərimli uzun illərdir ki, xarici anti-Azərbaycan qüvvələrin əlində oyuncaqdır və onlar tərəfindən idarə edilir. Bu qüvvələrə qulluq edən digər "milli" satqınlar kimi Kərimli də son beş ildə Azərbaycanın qazandığı böyük tarixi qələbələrin heç birinə sevinməyib. Əksinə, onlar bu zəfərlərə kölgə salmağa çalışıblar və xarici mərkəzlərin anti-Azərbaycan fəaliyyətlərinə dəstək veriblər. Azərbaycan cəmiyyəti onların əsl simasını çoxdan görüb və onları tarixin arxasına atıb. Cəmiyyətdən heç bir dəstək görməyən Əli Kərimli bütün ümidlərini indiyədək onu maliyyələşdirən xarici anti-Azərbaycan qüvvələrə bağlayıb. O, bu ümidlər özünü doğrultmadıqda daim yeni hami axtarışında olur.

Özünün "xalq uğrunda mübarizə apardığını" iddia edən Əli Kərimlinin vaxtilə sərt şəkildə tənqid etdiyi Ramiz Mehdiyev kimi bir şəxslə siyasi dil tapması onun ideoloji xəttinin nə qədər dəyişkən və situativ olduğunu sübut edir. Bu cür proseslər fonunda cəmiyyəti narahat edən əsas məqam siyasi manipulyasiyaların və xarici təsirlərə açıq davranış modellərinin mövcudluğudur. Son illərdə regionun geosiyasi gərginlikləri və böyük güclərin Qafqazda nüfuz mübarizəsi aparması xüsusilə nəzərə alınmalıdır. Hər hansı siyasi qüvvənin bu cür təsirlərə uyğun siyasət yürütməsi dövlət üçün ciddi risk yaradır. Radikal müxalifət daxilində dövlət maraqlarına zidd hərəkətlərin olması ictimaiyyət tərəfindən dəfələrlə tənqid edilib.

Qafqaz regionu hazırda çox həssas geosiyasi mühitdədir. Buna görə daxili siyasi qrupların hansı xarici mərkəzlərin təsirində olduğu məsələsi xüsusi diqqət tələb edir. Dövlət təhlükəsizliyi təhdidlərinin artdığı bir zamanda kənar təsirlərlə manipulyasiya edilə bilən strukturların vaxtında zərərsizləşdirilməsi prioritet məsələlərdən biridir. Siyasi qüvvələrin avantürist məqsədlər üçün istifadə olunması ölkənin sabitliyinə böyük zərbə vura bilər. Buna görə Ramiz Mehdiyev və Əli Kərimli arasındakı əlaqələrin araşdırılması, faktların obyektiv qiymətləndirilməsi və potensial risklərin aradan qaldırılması dövlətin əsas öhdəlikləridir. Azərbaycanın milli maraqlarına qarşı yönələn hər hansı fəaliyyətin neytrallaşdırılması həm milli təhlükəsizlik, həm də ictimai maraqlar üçün vacibdir. Deputat bildirib ki, bu gün hər zamankından daha güclü olan Azərbaycan, milli və dövlət maraqlarına qarşı yönələn hər cür təhlükəni dəf etmək iqtidarındadır. Xarici anti-Azərbaycan qüvvələrin maraqlarına xidmət edən hər bir şəxsin fəaliyyətinə hüquqi qiymət veriləcək.