Rəşt-Astara dəmir yolunun tikintisinə Novruz Bayramından sonra başlanılacaq - EKSKLÜZİV

Rəşt-Astara dəmir yolu layihəsində tikinti işlərinin gələn Novruz Bayramından sonra başlayacağı gözlənilir. "İran Dəmir Yolları"nın rəhbəri Cabbar Əli Zakeri açıqlamasında bildirib ki, layihənin reallaşması üçün əsas məsələ yolun keçdiyi ərazinin alınması ilə bağlıdır.

Dəmir yolu xətti cəmi 164 kilometr uzunluğundadır. Zakerinin sözlərinə görə, bu ərazinin 95 kilometri artıq satın alınıb. Tikintiyə başlamaq üçün yolun tamamilə azad olması vacibdir. Buna görə də hər həftə təxminən 3 kilometr ərazi satın alınır. Bu tədbirlər Rusiyanın tikinti şirkətinin işə başlaması üçün yolun təmizlənməsinə xidmət edir.

Ərazinin tam olaraq gələn ilin Novruz Bayramına qədər alınması və "Rusiya Dəmir Yolları" ASC-yə təhvil verilməsi planlaşdırılır. Hazırda Rusiyalı mühəndislər layihələndirmə işləri görürlər. Onlar, xüsusən də, geotexniki araşdırmalar aparırlar. Bütün bu hazırlıq işləri başa çatdıqdan sonra, əsas icra işlərinə Novruz Bayramından sonra başlanması nəzərdə tutulur.