"Sabah"ın baş məşqçisi: "Aşağı yaş qruplarımız Avropadakı həmyaşıdlarından geri qalmırlar"

"Sabah" Futbol Klubunun aşağı yaş qruplarından ibarət komandaları Avropadakı həmyaşıdlarından geri qalmırlar. Bu sözləri klubun 12 yaşadək futbolçulardan ibarət millisinin baş məşqçisi Məhərrəm Müslümzadə Türkiyədə qazandıqları uğuru dəyərləndirərkən deyib. O, komandanın Türkiyənin Antalya şəhərində keçirilən "Antalya Friendship Cup" turnirindəki çıxışını şərh edib. Baş məşqçi, ümumiyyətlə, belə beynəlxalq turnirlərin uşaqların inkişafı üçün vacib olduğunu vurğuladı.

Müslümzadə bildirdi ki, yarış çox yaxşı təşkil olunmuşdu və komandamız oyunları yüksək səviyyədə keçirdi. U-12 turnirində 12 komanda iştirak edirdi, onlar hərəsində 6 olmaqla iki qrupa ayrılmışdı. "Sabah" B qrupunda mübarizə aparırdı. Rəqiblər arasında Rusiyanın "Yunayted" (Yekaterinburq) və "Dinamo" (Moskva), həmçinin İrlandiyanın "Tempo" və İraqın "Amman" komandaları var idi. "Sabah"ın U-12 komandası qrupda keçirdiyi 5 oyunun hamısını qələbə ilə bitirdi. Yarımfinalda Litvanın "Margiris" komandasına 1:0 hesabı ilə qalib gələrək növbəti mərhələyə adladılar. Finalda isə "Yunayted"i 3:0 hesabı ilə məğlub edərək, turnirin çempionu oldular.

Məşqçi uşaqların meydançada göstərdikləri oyundan razı qalıb. O qeyd etdi ki, oyunçular istədikləri oyunu, arzu, istək və lazımi motivasiyanı göstərməyi bacardılar. Müslümzadə deyir ki, "Sabah"ın U-10, U-11 və U-12 komandalarının beynəlxalq turnirlərdəki çıxışları sübut edir ki, bu yaş qrupları Avropadakı həmyaşıdlarından geri qalmırlar. Məşqçinin fikrincə, onlara sadəcə daha çox beynəlxalq oyun təcrübəsi lazımdır. Buna görə də, bu cür turnirlər gələcək inkişaf üçün böyük əhəmiyyət daşıyır.