Santos Premyer Liqada yubiley oyununa çıxıb

Misli Premyer Liqasında əhəmiyyətli bir hadisə baş verdi. "Araz-Naxçıvan" klubunun hücumçusu Felipe Santos çempionatda 100-cü oyununa çıxdı.

Bu yubiley qarşılaşması XIII tura təsadüf etdi. Braziliyalı futbolçu bu oyunda "Qəbələ" ilə səfər matçına start heyətində başladı; matç 1:2 hesabı ilə rəqiblərin xeyrinə başa çatdı.

Santos 100 qarşılaşma ərzində rəqib qapılarına ümumilikdə 21 dəfə yol tapıb. Cənubi amerikalı hücumçu Premyer Liqada üç müxtəlif klubda forma geyinib. Onun liqadakı debütü 2021/22 mövsümünə təsadüf edir.

Karyerası boyunca o, "Şamaxı"da 21 oyun keçirib (6 qol), "Qəbələ"də 35 matçda iştirak edib (3 qol), cari klubu "Araz-Naxçıvan"da isə 44 matçda 12 qol vurub. Felipe Santos Azərbaycan çempionatında 100 və daha çox oyun keçirən 448-ci futbolçu kimi qeydə alınıb.