Səfərbərlik Xidməti İmişlidə gənclər üçün tədbir keçirib

Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) təşkilatçılığı və İmişli Rayon İcra Hakimiyyətinin dəstəyi ilə rayonda mühüm tədbir baş tutub. Heydər Əliyev Mərkəzində təşkil edilən görüş “Vətənpərvər Azərbaycan gəncliyi – Sağlam gənclik, sağlam gələcək” mövzusuna həsr olunmuşdu. Görüşdə açılış nitqi ilə çıxış edən İmişli Rayon İcra Hakimiyyətinin başçısı Elçin Rzayev belə tədbirlərin gənclərdə vətənpərvərlik hissinin artmasına müsbət təsir göstərdiyini bildirib. Tədbirin əsas məqsədi gələcəyin əsgərləri olacaq çağırışçıları maarifləndirmək və onların hərbi xidmətə hazırlığını yüksəltmək idi.

Tədbirdə iştirak edən SHXÇDX-nın Çağırışaqədərki hazırlıq idarəsinin rəisi, polkovnik-leytenant Füzuli İsmayılov çıxış etdi. O, müharibə dövründə gənclərin nümayiş etdirdiyi vətənpərvərlikdən danışdı. Həmçinin, sabahın əsgəri olacaq çağırışçıların fiziki və psixoloji vəziyyətlərini yüksək səviyyədə saxlamaq üçün görülən işlər barədə məlumat verdi. Polkovnik-leytenant İsmayılov ölkəmizdə 2025-ci ilin “Konstitusiya və Suverenlik İli” elan edilməsi ilə bağlı geniş məlumat təqdim etdi.

Dövlət Xidmətinin İctimaiyyətlə iş və beynəlxalq əlaqələr şöbəsinin rəisi Pərviz Sədrəddinov ali məktəbə hazırlaşan gənclərə vacib tövsiyələr verdi. O, xaricdə təhsil imkanları, təhsilə görə verilən möhlət hüququ və bir sıra xidmətlərin rəqəmsallaşdırılması barədə ətraflı məlumat çatdırdı. Ardınca SHXÇDX-nın İmişli rayon şöbəsinin rəisi, polkovnik Ruslan İsmayılov çıxış etdi. O, ilkin hərbi qeydiyyat, tibbi şəhadətləndirmə prosesləri, eləcə də çağırışçıların hüquq və vəzifələri barədə iştirakçılara məlumat verdi. İsmayılov tədbir iştirakçılarını maraqlandıran sualları da cavablandırdı.

Görüşdə Vətən Müharibəsi iştirakçıları və şəhid ailələri də iştirak edərək öz təəssüratları ilə bölüşdülər. Qeyd etmək lazımdır ki, Dövlət Xidməti analoji tədbirləri ölkənin fərqli rayonlarında təşkil edib. Bu maarifləndirici görüşlərin növbəti aylar ərzində də davam etdirilməsi planlaşdırılır.