Şəhidlər xiyabanında nalayiq hərəkətlər edən əcnəbilərin məhkəməsi üzrə hazırlıq iclası keçirilib

Şəhidlər Xiyabanında nalayiq hərəkətlər edərək çəkdikləri videogörüntünü sosial şəbəkələrdə yayan 3 Səudiyyə Ərəbistanı vətəndaşının- Alzaman Mahdi Ali, Alghabr Mohammad Hussain, və Alghabr Mahdi Mohammadın- cinayət işi üzrə məhkəmə hazırlıq iclası keçirilib. Bu şəxslər əməllərinə görə polis tərəfindən saxlanılmışdılar. Səbail Rayon Məhkəməsində baş tutan prosesdə əvvəlcə onların anket məlumatları dəqiqləşdirildi. Bu hadisə Şəhidlər Xiyabanı kimi müqəddəs bir məkana qarşı göstərilən ciddi hörmətsizliklə bağlıdır.

İclas zamanı təqsirləndirilən şəxslərin vəkilləri güclü müdafiə mövqeyi sərgilədilər. Vəkillər, müvəkkillərinin əməlində cinayət tərkibi olmadığını əsas gətirərək, cinayət işinə xitam verilməsini məhkəmədən xahiş etdilər. Vəkillərdən biri məhkəməyə bildirdi ki, onun müvəkkili harada olduğunun fərqində olmayıb. O izah etdi: "Mədəniyyətlərimiz fərqlidir. Qəbirlərimiz ayrı formadadır. Onlar bilməyiblər haradadırlar. Yanlış anlaşılma olub. İşə xitam verilməsini xahiş edirəm". Digər vəkillər də bu vəsatəti müdafiə etdilər.

Dövlət ittihamçısı isə bu vəsatəti əsassız hesab etdi. O, məhkəmədən təmin edilməməsini və işin baxışa verilməsini xahiş etdi. Hakim vəsatəti qəbul etmədi və işin məhkəmə baxışına verilməsi barədə qərar qəbul etdi. İşin tam baxış iclası 27 noyabrda keçiriləcək.

Xatırladaq ki, bu hadisə ilə bağlı araşdırmalara avqustun 17-də başlanmışdı. Üç əcnəbi şəxsin Xiyabanda nalayiq hərəkətlər etməsi və videosunu sosial şəbəkələrdə yayması böyük rezonans doğurmuşdu. Araşdırmalar nəticəsində müəyyən edildi ki, həmin şəxslər avqustun 13-də Bakıya 5 günlük turist kimi gəliblər. Onlar çəkdikləri videonu da məqsədli şəkildə sosial şəbəkələrdə yayıblar. Faktla bağlı Cinayət Məcəlləsinin 245-ci maddəsilə- Qəbir üzərində təhqiredici hərəkət- cinayət işi başlanmışdı.