Serbiya DİN parlament yaxınlığındakı atışmanı adam öldürməyə cəhd kimi qiymətləndirib - YENİLƏNİB

Serbiya Daxili İşlər Nazirliyi Belqrad şəhərində, Milli Assambleya Evinin yaxınlığında baş vermiş atışma hadisəsini adam öldürməyə cəhd kimi qiymətləndirib. Hadisə bu gün səhər saat 10:16 radələrində qeydə alınıb.

Nazirliyin yaydığı məlumata görə, V.A. (1955-ci il təvəllüdlü) adlı şübhəli şəxs toplantının iştirakçısı olmayıb. O, Prezident Aleksandar Vuçiçin tərəfdarlarının parlament qarşısında qurduqları çadırlardan birinə daxil olub. V.A. orada 1968-ci il təvəllüdlü M.B.-yə bir neçə dəfə atəş açıb, sonra həmin çadırda bilərəkdən yanğın törədib. Yanğın nəticəsində kiçik qaz balonu partlayıb. Belqrad polisi atəş açan şəxsi tez bir zamanda tutub və yanğın söndürülüb. Zərərçəkmiş M.B. dərhal xəstəxanaya yerləşdirilib, hadisə nəticəsində yalnız bir nəfər xəsarət alıb.

Polis ilkin araşdırma zamanı müəyyən edib ki, çadırda təcavüzkarın özü ilə gətirdikləri xaricində heç bir əlavə silah və ya sursat olmayıb. Şübhəli şəxs adam öldürməyə cəhd və qanunsuz şəkildə silah və partlayıcı maddələr saxlamaqda ittiham edilərək 48 saat müddətinə saxlanılıb. İş üzrə genişmiqyaslı araşdırma davam edir.