Şərqi Zəngəzur regionun nəqliyyat habına çevrilir - RƏY

Azərbaycan Prezidentinin rəhbərliyi altında aparılan sıx bərpa və yenidənqurma işləri nəticəsində Şərqi Zəngəzur regionun mühüm nəqliyyat mərkəzinə çevrilməkdədir. Bu barədə Milli Məclisin deputatı Vüqar Bayramov məlumat verib. O qeyd edib ki, Zəngəzur dəhlizinin Azərbaycan hissəsində işlər artıq yekunlaşmağa yaxındır. Bu infrastruktur layihələri Azərbaycanın geosiyasi mövqeyini daha da gücləndirməklə yanaşı, Orta Dəhlizin regional imkanlarını genişləndirəcək.

Deputatın verdiyi məlumata görə, mühüm layihələrin tikintisi sürətlə davam edir. Uzunluğu 140,6 km olan Horadiz-Ağbənd dəmir yolu xəttinin gələn il istifadəyə verilməsi planlaşdırılır. Bundan əlavə, 124 km uzunluğundakı Əhmədbəyli-Horadiz-Mincivan-Ağbənd avtomobil yolu demək olar ki, tamamlanıb. Bütün marşrutun, o cümlədən dəhlizin Ermənistan ərazisindən keçəcək hissəsində işlərin planlaşdırılması da nəzərə alındıqda, Zəngəzur marşrutunun 2028-ci ildə tam istifadəyə verilməsi gözlənilir. Bu dəhliz regional əlaqələrin qurulmasında əsas rol oynayacaq.

Şərqi Zəngəzur nəqliyyatdan başqa, həm də böyük turizm, sənaye və aqrar potensiala malik bölgədir. Ölkə Prezidentinin Zəfərdən sonrakı beş il ərzində işğaldan azad olunmuş ərazilərə səfərləri Qarabağ və Şərqi Zəngəzurun yeni inkişaf mərhələsinə qədəm qoyduğunu göstərir. Bu bölgə yaxın zamanda Azərbaycan iqtisadiyyatında əsas inkişaf drayverlərindən birinə çevriləcək. Bərpa-yenidənqurma prosesindən sonra Qarabağ və Şərqi Zəngəzur Azərbaycan iqtisadiyyatına reinteqrasiyaya və 12 milyard manatdan artıq yeni dəyərin formalaşmasına töhfə verə biləcək. Prezident İlham Əliyevin Cəbrayıl və Zəngilana son səfəri zamanı yeni təməlqoyma mərasimləri keçirilib, həmçinin həmin ərazilərə köçürülən sakinlərə mənzillərin açarları təqdim edilib.