SOCAR "Upstream" seqmentinə investisiyaları artıra bilər - S&P

“S&P Global Ratings”in əsas ssenarisi Azərbaycan Dövlət Neft Şirkətinin (SOCAR) karbohidrogen hasilatının tədricən azalmasını proqnozlaşdırır. Bu vəziyyət neft və qaz hasilatı ilə bağlı olan “Upstream” seqmentinə əlavə investisiyalar yatırılmasını tələb edə bilər. Agentlik qeyd edir ki, “Upstream” seqmenti SOCAR'ın əsas əməliyyat fəaliyyətinin nüvəsini təşkil edir və şirkətin EBITDA göstəricisinin başlıca mənbəyi sayılır. Buna görə də S&P, yeni yataqların işlənməsi və ya mövcud layihələrin genişləndirilməsi istiqamətində investisiyaların artacağını gözləyir.

Qiymətləndirmələrə görə, SOCAR 2024-cü ildə öz aktivlərindən 7,5 milyon ton neft və 7,7 milyard kubmetr təbii qaz hasil edib. Şirkət eyni zamanda bir sıra böyük beynəlxalq layihələrdə minoritar səhm paketlərinə sahibdir; bunlardan əsasları “Azəri-Çıraq-Günəşli” (AÇG) və “Şahdəniz” yataqlarıdır. Agentlik bildirir ki, SOCAR-ın resurs bazası əhəmiyyətli olaraq qalmasına baxmayaraq, hasilat həcmləri mövcud istehsal profili çərçivəsində azalmağa davam edəcək. Bu azalma AÇG yatağında hasilatın artıq pik nöqtəsini keçməsi və “Şahdəniz” layihəsində son dövrlərdə müəyyən istehsal azalmasının müşahidə olunması ilə əlaqədardır.

Bu gözlənilən xərcləri əks etdirmək üçün S&P öz əsas proqnozuna hər il təqribən 3 milyard manatlıq kapital qoyuluşunu daxil edir. Bu rəqəm son iki ilin investisiya səviyyəsini üstələyir. Bu artım SOCAR-ın hasilatı artırmaq və istehsal potensialını gücləndirmək üçün “Upstream” seqmentinə davamlı olaraq sərmayə yatırmaq niyyətini göstərir.

SOCAR-ın səyləri tamamlanmaq üzrə olan “Şahdəniz-2” layihəsi və bu ilin əvvəlində imzalanmış “Shah Deniz Compression” layihəsi ilə özünü göstərir. Bu fəaliyyətlər şirkətin gələcək illər üçün istehsal potensialını möhkəmləndirmək üçün atdığı addımlardır.