Sumqayıtda klinikada iynədən sonra ölən qadının ölüm səbəbi açıqlanıb - YENİLƏNİB

Sumqayıtda klinikada iynə vurulduqdan sonra ağırlaşan vəfat hadisəsinin səbəbi bəlli olub. 2025-ci il noyabrın 25-də, saat 10:30 radələrində, 1953-cü il təvəllüdlü Sumqayıt şəhər sakini Nigar Babaxanova yüksək təzyiq şikayəti ilə bağlı Sumqayıt Tibb Mərkəzinin nəzdindəki 3 nömrəli Ailə Sağlamlıq Mərkəzinə müraciət etmişdi. Həkim təyinatı əsasında xəstəyə “Aktoseril” preparatının inyeksiyası edildi. Lakin inyeksiya icra edilən zaman xəstənin halı qəfil pisləşdi və sürətlə inkişaf edən anafilaktik şok reaksiyası baş verdi. Tibb personalı tərəfindən dərhal mövcud klinik protokollara uyğun olaraq təcili yardım tədbirləri görüldü. Pasiyentin həyat fəaliyyətinin bərpası üçün bütün zəruri müdaxilələr ardıcıl şəkildə həyata keçirildi. Həkimlərin bütün səylərinə və reanimasiya tədbirlərinə baxmayaraq, saat 11:30 radələrində şəxsin bioloji ölümü qeydə alındı.

Klinika rəhbərliyi insidentlə bağlı prosedur detallarını da açıqladı. Bildirilib ki, inyeksiya tibbi təyinat və elektron qeydiyyat əsasında həyata keçirilib. Prosedurdan əvvəl preparatın seriya nömrəsi və yararlılıq müddəti yoxlanılmışdı. İnyeksiyanı sertifikatlı tibb bacısı sanitariya-gigiyena tələblərinə tam riayət etməklə icra etmişdir. Həmçinin, inyeksiya otağı normativlərə uyğun təchiz edilmişdi. Anafilaktik şok zamanı tələb olunan adrenalin, antihistamin preparatlar, tibbi avadanlıqlar və reanimasiya vasitələri tam hazır vəziyyətdə saxlanılırdı.

Hadisə baş verdiyi anda tibb heyəti Təcili Yardım Protokolları üzrə bütün müvafiq müdaxilələri vaxtında və düzgün şəkildə həyata keçirdiyini təsdiqləyir. Buna baxmayaraq, xəstənin həyatını xilas etmək mümkün olmadı. Vəfat edən şəxsin meyiti təşrih olunması üçün Məhkəmə-Tibbi Ekspertiza və Patoloji Anatomiya Birliyinin Sumqayıt şəhər şöbəsinə təhvil verilib. Qeyd edilir ki, hazırda klinikada baş verən bu ölüm hadisəsi ilə bağlı araşdırmalar davam edir.