Süni intelekt 4-cü sənaye inqilabını geridə qoyur - Musa Quliyev

Milli Məclisin deputatı Musa Quliyev bildirib ki, cəmiyyət olaraq biz təkcə dəyişikliklərə uyğunlaşmaqla kifayətlənməməli, həm də bu dəyişikliklərin yaradıcılarından olmalıyıq. O, bu fikirləri Dövlət Məşğulluq Agentliyi tərəfindən Bakıda ilk dəfə təşkil edilən Gələcəyin Peşələri Sammitində səsləndirib. Deputatın sözlərinə görə, peşələrin sürətlə dəyişdiyi müasir dünyada düzgün ixtisas seçimi insanın cəmiyyətə verdiyi töhfəyə, habelə yaşayış keyfiyyətinə və standartlarına birbaşa təsir göstərir.

Dünya çox sürətlə dəyişir; yeni peşələr yaranır, əməyin formaları və əmək münasibətləri dəyişməyə başlayır. Quliyev diqqəti süni intellektin (AI) insan həyatına sürətli şəkildə daxil olmasına yönəldib. Bu proses artıq 4-cü sənaye inqilabını geridə qoymaqdadır. Rəqəmsal texnologiya, robot sistemləri, yeni təhsil metodları və yeni peşələr ənənəvi əmək formalarını sıradan çıxarır. Bütün bunlar iş dünyasında ciddi dəyişikliklərə yol açır.

Bu səbəbdən, bu cür sammitlərin keçirilməsi olduqca önəmlidir. Musa Quliyev qeyd edib ki, peşəkar mühitdə əmək bazarında baş verən dəyişikliklər müzakirə edilməlidir. Yeni bacarıq tələbləri, həmçinin texnologiyanın və innovasiyaların iş dünyasına təsirləri geniş formada araşdırılmalıdır. Bu cür müzakirələr iştirakçıların gələcək iş dünyasına hazırlığını dəstəkləyir və onların yeni şərtlərə uyğunlaşmasına yardım edir.