Sunniya Durrani-Camal: "Azərbaycana aydın enerji keçidi planı lazımdır"

Asiya İnkişaf Bankının (ADB) Azərbaycandakı nümayəndəliyinin rəhbəri Sunniya Durrani-Camal ölkənin enerji sektorundakı gələcək strategiyası haqqında danışıb. Bakıda keçirilən XIII Beynəlxalq Xəzər Enerji Forumunda çıxış edən Durrani-Camal Azərbaycanın aydın enerji keçidi planına ehtiyacı olduğunu bildirib. O qeyd edib ki, enerji siyasətinə gəldikdə, ADB qazı keçid yanacağı kimi görür. ADB "Şahdəniz" qaz yatağına və onunla əlaqəli olan Cənub Qaz Dəhlizinə sərmayə yatırıb. Bu səbəbdən qaz həqiqətən də keçid yanacağı kimi vacibdir.

Nümayəndəlik rəhbəri əlavə edib ki, Azərbaycan üçün karbohidrogen ixracı həm də iqtisadiyyatın şaxələndirilməsi haqqında bir hekayədir. Ölkənin ixrac gəlirlərinin əhəmiyyətli hissəsi məhz bu mənbədən gəlir. Bu vəziyyət belə bir sual yaradır: Azərbaycan yanacaqdan başqa hansı məhsulları ixrac edə bilər? Durrani-Camal enerji keçidinin ədalətli olmasının vacibliyini vurğulayıb. Tədricən irəliləməyə imkan verəcək aydın bir planın olması zəruridir.

S. Camal tövsiyə edib ki, ixrac məsələsinə daha geniş mənada baxılmalıdır. Energetikada başqa istiqamətlər də var. Məsələn, geotermal enerji potensialı ölkədə mövcuddur; bu sahəni inkişaf etdirməyə və onun potensialını araşdırmağa dəyər. Böyük töhfə verə biləcək kritik önəmli faydalı qazıntı sahəsi də mövcuddur. İqtisadi şaxələndirmə nöqteyi-nəzərindən, yalnız yanacaq-energetika sektoruna deyil, onun hüdudlarından kənara da baxmaq lazımdır. Bu zaman qlobal səviyyədə marağın və tələbin artdığı uzunmüddətli istiqamətlər nəzərə alınmalıdır. O, qazdan əlavə, iqtisadiyyatın digər sahələrinə də diqqət yetirməyi tövsiyə edib.