TAP ilə indiyədək nəql edilmiş təbii qazın həcmi açıqlanıb

Trans-Adriatik Boru Kəməri (TAP) istismara verildiyi gündən bəri təxminən 52,7 milyard kubmetr təbii qaz nəql edib. Bu göstərici TAP-ın fəaliyyətə başlamasından beş il keçməsi fonunda açıqlanıb.

Energetika Nazirliyinə istinadən verilən məlumata görə, 52,7 milyard kubmetr təbii qazın nəqli layihənin uğurlu icrasını göstərir. TAP Cənub Qaz Dəhlizinin mühüm mərhələlərindən biri sayılır. Bu layihə Azərbaycanın enerji sahəsindəki etibarlı tərəfdaşlıq mövqeyini daha da gücləndirir.

Kəmər Azərbaycanın beynəlxalq bazarda mövqeyini möhkəmləndirməklə yanaşı, eyni zamanda regionda enerji təhlükəsizliyinin təmin olunmasına mühüm töhfə verir. Regional enerji təhlükəsizliyi üçün böyük əhəmiyyət daşıyan bu kəmər vasitəsilə Azərbaycan qazının Avropaya nəqli sabit şəkildə davam edir.