TDT ölkələri əmək, məşğulluq və sosial müdafiə sahəsində əməkdaşlığı genişləndirir - Baş katib

Türk Dövlətləri Təşkilatına (TDT) üzv ölkələr əmək, məşğulluq və sosial müdafiə sahəsində əməkdaşlığı genişləndirməyə çalışır. TDT ölkələri hazırda bir-biri ilə təcrübələrini bölüşür. Təşkilatın əsas məqsədi, üzv ölkələrin vətəndaşlarına öz vətənlərində olduğu kimi ən rahat işləmək imkanları yaratmaqdır.

Bu sözləri TDT-nin Baş katibi Kubanıçbek Ömüralıyev Bakıda keçirilən Türk Dövlətləri Təşkilatının əmək, məşğulluq və sosial müdafiə nazirlərinin birinci iclası çərçivəsində açıqlayıb. O qeyd edib ki, bu əməkdaşlığın inkişafı gələcəkdə də davam etdiriləcək. Hazırda bu istiqamətdə TDT-nin 55-dən çox layihəsi var.

Baş katib bu fəaliyyətlərin "Türk Dünyası 2040 Vizyonu" rəhbər tutulmaqla həyata keçirildiyini vurğulayıb. Əmək, məşğulluq və sosial müdafiə sahəsində əməkdaşlığın inkişaf etdirilməsi Təşkilat üçün çox vacibdir. Həmçinin, Türk Dövlətləri Təşkilatının 12-ci Zirvəsində Dövlət Başçıları tərəfindən qəbul edilmiş Qəbələ Bəyannaməsi də bu sahədə önəmli sənədlərdən biridir.