TƏBİB-ə daha çox hansı növ şikayətlər daxil olur?

Cari ilin doqquz ayı ərzində TƏBİB-ə ümumilikdə 21 754 vətəndaş müraciəti daxil olub. Müraciətlərin əksəriyyətini ərizələr təşkil edib, lakin şikayətlər də əhəmiyyətli hissəni təşkil edirdi. Müraciətlərin 71 faizi (15 359-u) ərizələr, 28,9 faizi (6 364-ü) şikayətlər idi, 0,1 faiz (31 müraciət) isə təkliflər olmuşdu. Sevindirici haldır ki, şikayətlərin sayında müsbət dinamika müşahidə olunur: 2024-cü ilin eyni dövrü ilə müqayisədə şikayətlərin sayı 31,83 faiz azalıb. Eyni zamanda, müraciətlərin həll olunma göstəricisində 3,7 faiz artım qeydə alınıb.

Bu məlumat TƏBİB-in İcraçı direktoru Vüqar Qurbanovun sədrliyi ilə tabeli tibb müəssisələrinin fəaliyyətinə dair keçirilən müşavirədə açıqlandı. Məlumatı TƏBİB-in Müraciətlərlə iş departamentinin rəhbəri İlham Hüseynov təqdim etdi. Departament rəhbəri daxil olmuş müraciətlər üzrə görülən tədbirlərin nəticələrini də şərh etdi. Əldə edilən nəticələrə görə, 16 039 müraciət (73,6 faiz) üzrə vətəndaşlara müvafiq izahatlar verildi. Ümumi müraciətlərin 2 897-si (13,3 faiz) tamamilə həll olundu, 1 356 müraciət (6,1 faiz) isə qismən təmin edildi.

İlham Hüseynov şikayətlərin əsas mövzularını da göstərdi. Vətəndaşların narahatlıqlarının əsas istiqamətləri tibbi xidmətin keyfiyyəti və əlillik məsələləri ilə bağlı idi. Digər tez-tez daxil olan şikayətlər tibbi personal və rəhbər şəxslərlə, həmçinin kadr və dərman təminatı problemləri ilə əlaqədar idi. Bundan başqa, işə qəbul istəkləri ilə bağlı da müraciətlər qeydə alınıb. O bildirdi ki, bu sahələrdə monitorinq tədbirləri daimi şəkildə aparılır. Beləliklə, hər bir müraciət üzrə fərdi qaydada qiymətləndirmə həyata keçirilir.