Təfəkkür Universitetinin prorektorunu qətlə yetirən şəxslə bağlı qərar verilib

Elm və Təfəkkür Universitetinin prorektoru Tariyel Əhmədovun öldürülməsində təqsirləndirilən Dəyanət Quliyev barəsində olan qərardan verilən kassasiya şikayətinə Ali Məhkəmədə baxış keçirilib. Hakim İlkin Rəcəbovun sədrliyi ilə keçirilən bu proses yekun qərarla başa çatıb. Ali Məhkəmə Dəyanət Quliyevin şikayətini təmin etməyib.

Bu qərar, Bakı Ağır Cinayətlər Məhkəməsinin əvvəlki hökmünün qüvvədə qalması deməkdir. Həmin hökmə əsasən, cinayətin təşkilatçıları və icraçıları olan Müşviq Atakişiyev, Dəyanət Quliyev və Samir Quliyev 14 il 6 ay müddətinə azadlıqdan məhrum ediliblər. Bakı Apellyasiya Məhkəməsi də bu hökmü dəyişdirmədən qüvvədə saxlamışdı. Cinayət işi Baş Prokurorluğun yaydığı məlumatlara görə, “Elm və Təhsil Mərkəzi Təfəkkür Universiteti”nin prorektoru Tariyel Əhmədovun 16 sentyabr 2011-ci ildə qəsdən öldürülməsi faktı ilə bağlı başlanmışdı. Həyata keçirilən istintaq-əməliyyat tədbirləri cinayəti törətməkdə təqsirləndirilən şəxsləri aşkarlamışdı.

İlkin istintaq zamanı müəyyən edildi ki, universitetin rektoru vəzifəsində işləmiş Müşviq Atakişiyev qohumu Dəyanət Quliyevə qətli sifariş verib. Atakişiyev Tariyel Əhmədovu rektor vəzifəsində qalmasına və işgüzar nüfuzuna maneə kimi qəbul edirdi. Bu səbəbdən o, qisas məqsədilə pul müqabilində Əhmədovun öldürülməsini sifariş edib. Dəyanət Quliyev isə bu cinayəti həmkəndlisi Samir Quliyevə sifarişlə həyata keçirməyi tapşırıb. Cinayəti icra edən Samir Quliyev 40 min ABŞ dolları, habelə gələcəkdə maddi və mənəvi dəstək olmaq şərti ilə razılaşıb. O, zərərçəkmiş şəxsi bir neçə gün izlədikdən sonra Bakı şəhəri, Yasamal rayonunun Şərifzadə küçəsində yerləşən idman meydançalarından birində küt əşya ilə Tariyel Əhmədovun baş və bədəninin müxtəlif nahiyələrinə zərbələr endirərək onun ölümünə səbəb olan xəsarətlər yetirib.

Müşviq Atakişiyev (sifarişçi) və Dəyanət Quliyev (sifarişçi) Cinayət Məcəlləsinin 32.3, 120.2.5-ci (sifarişlə adam öldürmədə təşkilatçı), Samir Quliyev (icraçı) isə CM-in 120.2.5-ci (sifarişlə adam öldürmə) maddəsi ilə təqsirləndirilən şəxs qismində cəlb ediliblər. Onlar barəsində həbs qətimkan tədbiri seçilib və cinayət işi baxılması üçün Bakı Ağır Cinayətlər Məhkəməsinə göndərilib. Qeyd edək ki, iqtisad elmləri doktoru, professor Müşviq Atakişiyev qətlin baş verdiyi dövrdə Təfəkkür Universitetinin rektoru idi. Universitet daha sonra, 2017-ci ildə ləğv edilib.