Timsahlarla dolu çay Avstraliya Olimpiadasında yarışmaq üçün yararlı hesab edilib

Avstraliyada 2032-ci il Brisben Olimpiya və Paralimpiya Oyunları üçün idman obyektlərinin təkmilləşdirilməsi və tikintisinə cavabdeh olan milli qurum Fitzroy çayını kanoe yarışlarının keçirilməsinə uyğun hesab edib. Bu qərar maraqla qarşılanıb, çünki sözügedən çay timsahlarla doludur. "The Australian" nəşri məlumat yayıb ki, təhlükəyə baxmayaraq, məsuliyyət daşıyan Milli Qurum Fitzroy çayının beynəlxalq idman tədbirləri üçün istifadəsinə razılıq verib.

Bu məsələ Avstraliya hökumətində də təsdiqini tapıb. Avstraliya Federal Parlamentinin Qvinslend ştatı üzrə üzvü Mett Kanavan çayda yarış keçirilməsi üçün heç bir maneənin olmadığını bildirib. Kanavan qeyd edib ki, bütün məlumatlar toplanıb və 2032-ci ildə avarçəkmə yarışları üçün artıq "yaşıl işıq" yanıb. Mütəxəssislər də bu qərarı dəstəkləyiblər. Onlar çayın Beynəlxalq Avarçəkmə Federasiyasının tələblərinə tam uyğun olduğunu bəyan ediblər, beləliklə, məkanın texniki uyğunluğuna dair şübhələr aradan qalxıb.

İdmançıların təhlükəsizliyi məsələsi regional hakimiyyətlərin diqqət mərkəzindədir. Kvinslend ştatının baş naziri David Krisafulli timsahlarla bağlı yaranan təhlükəni aradan qaldıracağına dair vəd verib. O bildirib ki, regional hakimiyyətlər timsahların çayı istilasına qarşı mübarizə aparacaq. Bu vədlər Olimpiya avarçəkmə yarışları üçün seçilən ərazinin təmizlənməsi və idmançılar üçün təhlükəsiz şəraitin yaradılması hökumətin öhdəliyində olduğunu göstərir. Beləliklə, 2032-ci il Olimpiadası üçün ciddi hazırlıq işlərinə başlanılır.