Tokayev Prezident İlham Əliyevə Ermənistana tanzit yükdaşımalarına qoyulan məhdudiyyətin aradan qaldırılması qərarına görə təşəkkür edib

Qazaxıstan Prezidenti Kasım-Jomart Tokayev, Ermənistana tranzit yükdaşımalarına qoyulan məhdudiyyətin aradan qaldırılması barədə qərara görə Prezident İlham Əliyevə təşəkkür edib. Tokayev bu bəyanatı Ermənistanın Baş naziri Nikol Paşinyanla keçirdiyi görüşün yekunlarına dair KİV nümayəndələrinə danışarkən verib. Bu addım regionda birbaşa ticarət əlaqələrinin yaranması üçün vacib şərait yaradır.

Qazaxıstan lideri Azərbaycan rəhbərinə sanksiyaların ləğvinə və ölkəsinin ərazisi vasitəsilə birbaşa ikitərəfli ticarət üçün şərait yaradılmasına görə minnətdarlığını ifadə edib. O qeyd edib ki, bu qərarın iqtisadi nəticələri artıq görünməyə başlayıb. Məsələn, cari ilin noyabr ayında Azərbaycan ərazisi vasitəsilə Ermənistana 1 min ton həcmində Qazaxıstan buğdasının ilk partiyası çatdırılıb. Tokayev vurğulayıb ki, bu təşəbbüs xüsusi siyasi və iqtisadi əhəmiyyət daşıyır.

Onun sözlərinə görə, Qazaxıstan Ermənistana yüksək keyfiyyətli taxıl məhsulları və digər malları müntəzəm əsasda tədarük etməyə hazırdır. Dövlət başçısı bildirib ki, tərəflər bu istiqamətin daha da inkişafı üçün bütün zəruri səyləri göstərməyə razılaşıblar. Xatırlatmaq yerinə düşər ki, Azərbaycan Prezidenti İlham Əliyev bu məhdudiyyətlərin aradan qaldırıldığını 21 oktyabr tarixində, Qazaxıstan Prezidenti Kasım-Jomart Tokayevlə birgə mətbuata bəyanatında bildirmişdi. Həmin vaxt qeyd edilmişdi ki, Azərbaycan işğal dövründən mövcud olan Ermənistana yük tranziti ilə bağlı bütün məhdudiyyətləri ləğv edib.