Tramp 2020-ci il seçkilərini ləğv etməyə cəhddə şübhəli bilinən əsas şəxsləri əfv edib

ABŞ Prezidenti Donald Tramp 2020-ci il seçkiləri zamanı alternativ seçici siyahısı yaratmaq və "seçki saxtakarlığını ifşa etmək" planında iştirak etdiyi ehtimal olunan əsas şəxslərin ümumi əfvini elan edib. Trampın bu qərarı onun ən yaxın siyasi müttəfiqlərini və köməkçilərini 2020-ci il seçki nəticələrinə etiraz cəhdlərinə görə irəli sürülə biləcək ittihamlardan qoruyur. Bu addım ABŞ-da geniş müzakirələrə səbəb olub.

Bu barədə ABŞ-nin federal prokuroru Ed Martin məlumat yayıb. Martinin sözlərinə görə, bu əfvlər 2020-ci il seçki dövründə ən çox diqqət çəkən və Trampın seçki iddialarını dəstəkləyən bir neçə yüksək səviyyəli şəxsi əhatə edir. Əfv edilən şəxslərin siyahısında Rudi Culiani, Sidni Pauell, Boris Epşteyn, Con İstmen və Mark Medouzu kimi tanınmış adlar var.

Əfv sərəncamı sadalanan bu şəxslərlə məhdudlaşmır. Federal prokuror onu da bildirib ki, Donald Trampın qərarı 2020-ci il seçkilərinin nəticələrinə etiraz cəhdləri ilə əlaqəli olduğu ehtimal edilən digər 72 şəxsi də əhatə edir. Beləliklə, Tramp seçkilərin ləğv edilməsinə cəhd və saxtakarlıq iddiaları ilə bağlı proseslərdə iştirak edən böyük bir qrupa qarşı yaranan hüquqi təqibləri dayandırmış olur.