Tramp Putinlə Macarıstanda görüşünü ləğv etmə səbəbini açıqlayıb

ABŞ Prezidenti Donald Tramp Rusiya lideri Vladimir Putinlə Budapeştdə keçirilməsi nəzərdə tutulan görüşünü ləğv etməsinin səbəbini açıqlayıb. Trampın sözlərinə görə, o, Rusiya tərəfinin Ukrayna ilə müharibəni bitirməyə hazır olmadığını görüb, buna görə də görüş baş tutmayıb.

Amerika lideri bu barədə Macarıstanın Baş naziri Viktor Orbanla görüş zamanı jurnalistlərin suallarını cavablandırarkən danışıb. Tramp qeyd edib ki, əsas fikir ayrılığı Moskva tərəfinin hələ də müharibəni dayandırmaq istəməməsidir. O, vəziyyəti şərh edərkən bunun hər iki ölkəyə, xüsusilə Rusiyaya böyük təsir göstərdiyini vurğulayıb.

Prezident Tramp, bu çətinliklərə baxmayaraq, Rusiyanın sonda dayanacağına inandığını bildirib. O, münaqişənin "çox uzaq olmayan gələcəkdə" həll olunacağına dair ümidini ifadə edib. Tramp əlavə edib ki, əgər Putinlə görüş barədə razılıq əldə edilsə, o, bu danışıqları Macarıstanın paytaxtında - Budapeştdə keçirməyə üstünlük verərdi.