Tramp Qəzza ilə bağlı qətnamənin qəbuluna görə BMT TŞ-yə təşəkkür edib

ABŞ Prezidenti Donald Tramp, Vaşinqton administrasiyasının Qəzza zolağı üzrə sülh planını dəstəkləyən qətnaməni qəbul etdiklərinə görə BMT Təhlükəsizlik Şurasına (TŞ) üzv dövlətlərə minnətdarlığını bildirib. Bu sənəd bazar ertəsi qəbul edildi. Təhlükəsizlik Şurasının 15 üzvündən 13-ü qətnamənin lehinə səs vermişdi. Amerika lideri bu barədə məlumatı özünün "Truth Social" sosial şəbəkəsində yayımladı. Tramp səsvermənin nəticəsində Sülh Şurasının tanındığını və təsdiqləndiyini qeyd etdi.

Prezident Tramp BMT Təhlükəsizlik Şurasında keçirilən səsverməni "inanılmaz" adlandıraraq, bütün dünyanı təbrik etdiyini söylədi. O bəyan edib ki, bu qərar BMT tarixində ən vacib qərarlardan biri kimi yadda qalacaq. Trampın fikrincə, bu hadisə bütün dünyada sülhün möhkəmlənməsinə imkan verəcək və həqiqətən tarixi miqyaslı bir an olacaq. O həmçinin bildirib ki, yeni yaradılan Sülh Şurasına özü rəhbərlik edəcək. Şuraya dünyanın ən nüfuzlu və hörmətli liderləri daxil ediləcək.

ABŞ lideri səsvermədə iştirak edən bütün ölkələrə xüsusi təşəkkürünü çatdırdı. O, TŞ-yə daxil olan Çin, Rusiya, Fransa, Böyük Britaniya, Əlcəzair, Danimarka, Yunanıstan, Qayana, Cənubi Koreya, Pakistan, Panama, Syerra-Leone, Sloveniya və Somali dövlətlərinin adlarını çəkdi. Tramp həmçinin Qəzza sektorunda nizamlanma səylərinə verdikləri dəstəyə görə Yaxın Şərqin bir sıra ölkələrinə, o cümlədən Qətər, Misir, BƏƏ, Səudiyyə Ərəbistanı, İndoneziya, Türkiyə və İordaniyaya da minnətdarlığını ifadə etdi. Prezident qeyd edib ki, Sülh Şurasının tərkibi növbəti həftələrdə açıqlanacaq və digər maraqlı xəbərlər də veriləcək.